WHO ta confirma caso di hantavirus na Hulanda despues di brote riba crucero

DEN HAAG – Organisacion Mundial di Salud (WHO) a confirma un caso nobo di hantavirus na Hulanda relaciona cu e brote cu a surgi riba e barco crucero Hondius. Segun WHO, ta trata di un miembro di tripulacion cu a baha na Tenerife y despues a wordo repatria pa Hulanda, unda actualmente e persona ta den aislamiento.

Segun informacion publica pa WHO, ya tin 12 caso confirma di contagio relaciona cu e brote aki. Tres persona a perde nan bida como consecuencia di e virus. Desde 2 di mei, ora cu e brote a wordo reporta oficialmente pa WHO, no a registra ningun morto nobo.

Autoridadnan internacional di salud ta monitorea mas cu 600 persona den 30 pais diferente, incluyendo pasahero y tripulante cu posiblemente a wordo expone na e virus. Ademas, servicio di salud ta sigui buscando algun otro persona cu posiblemente tin halto riesgo di besmetting.

WHO ta pidi paisnan involvi pa sigui controla y monitorea pasahero y tripulantenan durante resto di e periodo di cuarentena, pa evita cu e virus sigui propaga mas leu.

Hantavirus ta un virus raro pero peligroso cu generalmente ta transmiti door di contacto cu djakanan of nan excremento. Simptomanan por varia for di keintura y dolor muscular te problema serio di respiracion.