Reino ta modernisa ley di extradicion pa Aruba y Corsou despues di casi 100 aña

DEN HAAG – Reino Hulandes ta preparando un  Ley di Extradicion completamente nobo pa Aruba, Corsou y Sint Maarten, reemplazando reglanan cu ainda tabata basa mayormente riba e antiguo “Curaçaosch Uitleveringsbesluit” di 1926, origina  for di epoca colonial.

E propuesta di ley ya a wordo presenta na Parlamento Hulandes y tambe na Parlamentonan di Aruba, Corsou y Sint Maarten. Segun splicacion oficial, e cambio a bira necesario despues di modificacionnan den Statuut di Reino cu a drenta na vigor dia 1 di januari 2024, cu ta exigi cu asunto di Reino manera extradicion mester wordo regula oficialmente via un Rijkswet aproba pa tur paisnan di Reino.

Gobierno hulandes a indica cu sistema practico di extradicion lo keda grandemente mescos, pero cu diferente articulonan a wordo modernisa y adapta na reciente decisionnan di Hoge Raad.

Entre e cambionan mas importante tin inclusion explicito di proteccionnan di derecho humano. E   ley nobo lo prohibi extradicion den caso cu tin riesgo di persecucion discrimatorio basa riba religion, opinion politico, raza of nacionalidad. Tambe lo por rechasa peticionnan di extradicion considerando edad, condicionnan medico of situacionnan excepcionalmente duro.

Ademas, e ley ta incorpora oficialmente principio di “ne bis in idem”, loke significa cu un persona no por wordo extradita atrobe pa un caso unda ya tin un sentencia definitivo. Tambe tin proteccionnan adicional pa condenacionnan “bij verstek”, esta, den ausencia di sospechoso.

Bou e propuesta, Corte Hunto di Husticia lo sigui encarga  cu revision legal di extradicion, mientras Gobernador lo tuma decision final si extradicion ta wordo aproba of no.