Lito Laclé ta gana presidencia di sindicato di polis SPA cu amplio respaldo

ORANJESTAD – Sindicato di Polis Aruba (SPA) a conoce un cambio importante den su liderato despues cu Lito Laclé a gana e eleccion pa presidente cu un respaldo contundente di e miembronan. Durante e votacion realiza dialuna, Laclé a logra 164 voto, mientras cu presidente saliente Rodney Solognier a haya 37 voto. Un total di 201 miembro a haci uso di nan derecho di voto.

Den e puesto di vicepresidente, Bernardus a logra sali victorioso cu solamente un voto di diferencia riba su competidornan.

Alex Wernet, comisario di e directiva saliente, a confirma e resultado y a gradici Rodney Solognier pa su compromiso durante e periodonan dificil unda, segun el, poco hende tabata dispuesto pa sigui lidera e sindicato.

Despues di e resultado, Rodney Solognier a expresa su satisfaccion cu e participacion grandi di e miembronan den e eleccion. E la declara cu e ta contento cu tin un presidente nobo y cu e votonan masalmente ta mustra cu e miembronan kier cambio. Solognier a bisa cu el ta habri caminda pa e directiva nobo y cu “tin un tempo pa yega y un tempo pa bay.”

Di su banda, Lito Laclé a gradici e confianza cu 78% di e votantenan a deposita den dje y a enfatisa cu su prioridad lo ta e bienestar di e agentenan policial. E la reconoci cu Cuerpo Policial Aruba ta enfrenta hopi reto serio, incluyendo falta di personal, promesanan cu no a wordo cumpli y incertidumbre riba diferente tema laboral manera e rechtspositie di e agentenan.

Laclé a declara cu apesar cu hopi hende ta mire como un persona fuerte den palabra, e  no ta busca confrontacion. Segun e, tur opinion den e cuerpo ta conta y unidad lo ta esencial pa move dilanti.

E presidente nobo di SPA lo ocupa e puesto pa un periodo di dos aña y a indica cu su meta tambe ta prepara futuro lidernan pa sigui hiba e sindicato dilanti.