Mas speransa pa buelonan mas barata entre Sint Maarten, Saba y Statia

PHILIPSBURG – Despues di mas di 15 aña di discusion, tin mas speransa pa buelonan di avion entre Sint Maarten, Saba y Sint Eustatius bira mas barata. Experto di aviacion Hans de Jong ta bisa cu casi tur obstaculonan legal a desaparece, loke ta habri caminda pa gobierno hulandes subsidia e rutanan.

E idea ta pa introduci un sistema di Public Service Obligation (PSO), cu lo yuda mantene prijsnan mas accesibel pa habitantenan y garantiza mihor conexion aereo pa e islanan.

Desde 2010, residente di Saba y Statia constantemente a critica e costo halto di buelonan. Apesar di hopi reunion y bishitanan oficial, te awor poco solucion concreto tabata existi.

Segun De Jong, un PSO probablemente no lo crea mas competencia, pero lo duna mas  stabilidad y siguridad den transporte aereo. Winair ta sigui e principal compania cu ta atende e rutanan.

Gobierno hulandes tambe ta enfrenta e pregunta con pa cubri e costo anual di subsidio, calcula entre 2 y 2,5 miyon euro pa aña.