KIA ta mira posibilidad di usa “drone jammer” contra contrabanda

ORANJESTAD - Minister di Husticia Arthur Dowers a ricibi un presentacion riba uso di un “drone jammer”, un aparato moderno cu lo yuda fortifica siguridad rond di Korrektie Instituut Aruba (KIA).

Segun autoridadnan, criminalnan regularmente ta usa drone pa introduci contrabanda manera droga, telefon y otro producto prohibi den prizon. Pa enfrenta e problema aki, Cuerpo Especial Arubano (CEA) a adquiri e tecnologia nobo cu por detecta, intercepta y tuma control di dronenan cu drenta den e zona prohibi rond di KIA.

Actualmente, un grupo selecta di personal di CEA ta recibi entrenamento pa maneha e aparato eficientemente y actua rapidamente ora detecta drone den cercania di prizon.

Durante e presentacion, autoridadnan a enfatisa cu gobierno no lo tolera actividadnan cu ta pone siguridad di sistema coreccional na peligro y cu inversion den tecnologia moderno ta importante pa mantene control y combati contrabanda den Aruba.