Hof: Co-sospechosonan Sussebeek y Arends tambe ta bay prizon bek pa caso Avestruz

ORANJESTAD - Den e caso penal grandi “Avestruz”, no solamente ex-minister Benny Sevinger a keda condena definitivamente diamars mainta, pero tambe su co-sospechosonan Pieter Sussebeek y Leoncita Arends lo mester cuminsa sinta nan castigo di prizon, despues cu Hof a mantene nan sentencia.

SUSSEBEEK

Pieter Sussebeek a ricibi un condena di 30 luna di prizon, di cual 10 luna ta condicional. Segun corte, e la duna regalo y beneficio na Sevinger – manera construccion, gym y otro facilidadnan – pa haya tereno di gobierno, cu despues e la bende cu ganashi grandi, yegando te 1,3 miyon dollar.

ARENDS

Leoncita Arends, pa su banda, a wordo condena pa 24 luna (12 condicional) di prizon.  Corte a determina cu e la participa den e eskema pa haya tereno di gobierno via contacto politico y pago den efectivo, incluyendo entrega di placa na sobre pa influencia decisionnan.

ABUSO DI PODER 

E caso Avestruz ta gira rond di abuso di poder, corrupcion y manipulacion di tereno di gobierno durante e periodo 2009-2017, unda Benny Sevinger a usa su posicion ministerial pa favorece conocinan y persona relaciona, a cambio di donacionnan y beneficio personal.

TRES CONDENA CU TIN CU SINTA CASTIGO

Cu e decision di Hof pa mantene e condenanan diamars mainta, ta cla cu tur tres – Sevinger, Sussebeek y Arends – lo mester enfrenta nan castigo efectivo, marcando un momento importante den lucha contra corrupcion na Aruba.