Corte: Empresanan no por ‘verreken’ debe cu placa cu mester ricibi di belasting

ORANJESTAD – Empresanan na Aruba no por compensa debe cu gobierno cu nan obligacion di impuesto. Esaki ta loke Hoge Raad a determina den un fayo di 10 di April ultimo.

E caso a cuminsa cu un bufete di abogado na Aruba cu ainda tabatin placa pa ricibi di gobierno pa asistencia legal na personanan cu poco recurso.

E empresa a trata di compensa e cantidad cu gobierno mester paga nan cu impuesto riba salario, impuesto riba entrada di negocio y contribucion pa seguro medico general. Belastingdienst no a acepta esaki y a impone pago adicional y multa.

Hoge Raad a dicidi cu e forma di actua aki ta contra ley. Segun hueznan, ley fiscal di Aruba no ta permiti pa e contribuyente compensa e debe di belasting cu otro reclamo riba gobierno. E prohibicion aki ta aplica no solamente ora di cobra despues, pero ya na momento cu declaracion di impuesto  wordo haci.

Cu esaki, Hoge Raad ta confirma un decision anterior di Gemeenschappelijk Hof. E pago adicional y multanan ta keda na vigor y apelacion a wordo rechasa.

E fayo ta nifica cu empresanan cu ainda tin placa pa ricibi di gobierno di Aruba mester sigui paga nan impuesto completamente. Compensacion ta permiti solamente si Belastingdienst mes dicidi esaki.