Minister di Husticia di Sint Maarten kier usa modelo di Aruba pa reforza control

PHILIPSBURG / ORANJESTAD – Minister di Husticia di Sint Maarten Nathalie M. Tackling  kier usa modelo di Aruba pa reforza control  

E minister   a bishita Aruba diahuebs 19 di maart durante celebracion di Himno y Bandera, cu meta di studia sistema di control di frontera di e isla.

Durante su bishita, Minister Tackling, hunto cu Minister di Husticia di Aruba, Arthur Dowers, a bishita departamento di inmigracion na Aeropuerto Internacional Reina Beatrix, unda e departamento tabata celebra su 57 aña di existencia. Aya e la ricibi un presentacion detaya di sistema RADEX, cu Aruba ta usa pa controla frontera, pa evalua con e sistema por wordo adapta na Sint Maarten.

Ademas, e minister a sostene reunion cu representantenan di United States Customs and Border Protection (CBP). Den e combersa nan, nan a trata tecnologia avansa manera APIS, ATS, TECS, Global Entry y control biometrico, tur enfoca riba haci proseso di pasajero mas rapido, eficiente y sigur.

Durante e bishita, tambe a mustra mehoracion reciente na aeropuerto, incluyendo un sistema central automatico pa maneho di maleta, cu ta yuda acelera e proseso di check-in y control di equipahe.

Segun Minister Tackling, e conocemento y experencia haya na Aruba lo yuda Sint Maarten fortalece su sistema di control di frontera, mehora eficiencia operacional y ofreci un mihor experencia di biahe, manteniendo un nivel haltu di seguridad.