Padu honra cu portret conmemorativo na Aruba

ORANJESTAD – Den un ceremonia informal na Checkpoint Color, artista Peter van den Heuvel, hunto cu Vivian Lampe, a revela un portret conmemorativo di Padu Del Caribe, como parte di celebracion di 50 aña di Aruba Dushi Tera.

E obra ta mustra Padu den su mihor tempo, incorporando elemento simbolico manera laman, colornan di pasion y partitura di e himno nacional, resaltando su amor profundo pa Aruba.

Padu Lampe, considera como Tata di cultura di Aruba, a laga un legado fuerte como compositor, cantante y pintor, documentando historia y identidad di isla.

E pintura lo wordo dona na un edificio publico, como homenaje permanente na un di e figura cultural mas importante di Aruba.