Polis a multa 44 chauffeur pa core auto cu velocidad halto

ORANJESTAD – Polis diabierna anochi a multa 44 chauffeur pa core auto cu velocidad halto   Den e ultimo dianan por a ripara cu tin varios accidente grave, caminda velocidad halto ta hunga un rol. 

Den un forma preventivo pa asina baha e cifra di accidentenan y garantisa siguridad den trafico, Cuerpo Policial Aruba a intensifica e controlnan rond di e isla.

​Diabierna anochi unidad motorisa a tene un control pa cu velocidad halto. Esaki a tuma lugar na altura di Seroe Tijshi. E resultado di e control aki ta duna un bista preocupante di e comportacion di algun chauffeur den trafico. 

Un total di 44 chauffeur a wordo haya boet pa maneha mas duro cu e velocidad maximo permiti. ​E caso mas extremo tabata un persona cu a wordo gara coriendo na un velocidad di no menos cu 146 km pa ora.

Polis  kier manda un aviso cla y raspa  cu e controlnan aki lo sigi den e temporada aki.  KPA ta enfatisa cu e meta no ta djis duna boet, sino pa evita desgracia cu por costa bida.