ONU: Preocupacion tocante pobreza y desigualdad riba islanan caribeño den Reino Hulandes

DEN HAAG/WILLEMSTAD – Naciones Uni ta expresa atrobe preocupacion serio tocante pobreza, desigualdad y derechonan social riba e islanan caribeño den Reino. Segun e Comision di Naciones Uni pa Derechonan Economico, Social y Cultural, e diferencianan cu Hulanda Europeo ta keda grandi y ta haci falta esfuerzo adicional pa sigura derechonan humano den parti caribeño.

E critica ta den e evaluacion mas reciente di Reino Hulandes bou di tratado di Naciones Uni tocante derechonan economico, social y cultural. Den un carta di gabinete na Tweede Kamer ta confirma cu e recomendacionnan di comite di ONU ta enfoca fuertemente riba situacion den parti caribeño di Reino, specialmente Caribe Hulandes.

E comision ta señala problemanan persistente rond di pobreza, seguridad social, acceso na cuido di salud, enseñansa y vivienda. Tambe discriminacion y oportunidadnan desigual ta sigui siendo puntonan di atencion segun ONU. E supervisornan internacional ta yama Reino pa sigura mihor derechonan di habitantenan di e islanan caribeño y pa reduci diferencianan structural cu Hulanda Europeo.

FACTORNAN FINANCIERO Y ECONOMICO 

Segun e carta di gabinete, e comite di ONU ta mira tambe motibo pa examina factoran financiero y economico cu ta influi riba derechonan humano den Caribe. Aki ta trata entre otro di politica fiscal, circunstancianan socioeconomico y rol di institucionnan financiero.

Den Reino ta conta cu tratadonan internacional formalmente ta wordo cera pa Reino, pero Aruba, Corsou y Sint-Maarten mes ta responsabel pa ehecucion ora un tratado ta aplica pa nan. Na mes momento, organonan di ONU ta enfatisa cu Reino como totalidad ta keda final responsable pa cumpli obligacionnan di derechonan humano.

E recomendacionnan ricibi ta marca inicio di un fase nobo unda Hulanda y e paisnan caribeño mester indica con nan lo sigui e critica. Un reaccion di contenido riba recomendacionnan di ONU lo wordo manda pa Tweede Kamer pa un siguiente gabinete.