Rodriguez: Venezuela ta rechasa y denuncia agresion militar

CARACAS – “E Republica Bolivariano di Venezuela ta rechasa, repudia y ta denuncia dilanti di comunidad internacional e agresion militar hopi grave cometi pa e gobierno actual di Estados Unidos di America contra territorio y poblacion Venezolano den localidatnan civil y militar di ciudad Caracas, capital di e Republica, y den e estadonan Miranda, Aragua y La Guaira”. Esaki tabata e prome reaccion di gobierno venezolano diasabra mainta riba e atake mericano. “E acto aki ta constitui un violacion flagrante di e Carta di Naciones Unidas, specialmente di su articulonan 1 y 2, cu ta confirma respeto pa soberania, igualdad huridico entre estadonan y e prohibicion di uso di forsa. Tal agresion ta amenaza pas y estabilidad internacional, concretamente den America Latina y e Caribe, y ta pone na grave riesgo e bida di miyonan di persona.

E objetivo di e atake aki no ta otro cu apodera di e recurso strategico di Venezuela, specialmente su petroleo y mineralnan, intentando kibra pa forsa e independencia politico di e Nacion. Nan no lo logra. Despues di mas cu doscientos aña di independencia, e pueblo y su gobierno legitimo ta keda firme den defensa di soberania y di e derecho inalienable pa dicidi su propio destino. E intento di impone un guerra colonial pa destrui e forma republicano di gobierno y forza un “cambio di regimen”, den alianza cu e oligarquia fascista, lo fracasa mescos cu tur e intentonan anterior.

Desde 1811, Venezuela a enfrenta y a vence imperionan. Ora na 1902 potencia for di pais a bombardea nos costa, e Presidente Cipriano Castro a proclama: “E planta insolente di e extranjero a profana e suelo sagrado di e Patria.” Awe, cu e moral di Bolivar, Miranda y nos libertadornan, e pueblo Venezolano ta lanta atrobe pa defende su independencia contra e agresion imperial.

PUEBLO RIBA CAYA

E Gobierno Bolivariano ta yama na tur forsa social y politico di e pais pa activa e planonan di movilizacion y repudia e atake imperialista aki. E pueblo di Venezuela y su Fuerza Armada Nacional Bolivariana, den fusion perfecto pueblo-militar-policial, ta desplega pa garantisa soberania y pas. Al mes tempo, e Diplomacia Bolivariano di Pas lo eleba e denuncia correspondiente dilanti di e Conseho di Seguridad di ONU, e Secretario General di e organizacion, e CELAC y e MNOAL, exigi condena y rendicion di cuenta di e Gobierno Mericano.

E Presidente Nicolas Maduro a ordena cu tur plan di defensa nacional wordo implementa na momento y circunstancianan apropiado, den estricto cumplimiento di loke ta stipula den Constitucion di e Republica Bolivariano di Venezuela, e Ley Organico tocante Estado di Excepcion y e Ley Organico di Seguridad di e Nacion.

Den e sentido aki, e Presidente Nicolas Maduro a firma y a ordena implementacion di e Decreto cu ta declara estado di Conmocion Exterior den henter territorio nacional, pa protehe e derechonan di e poblacion, e funcionamiento pleno di e institucionnan republicano y pa pasa inmediatamente na lucha armado. Tur e pais mester activa pa derota e agresion imperialista aki.

Di mes manera, e la ordena e despliegue inmediato di e Comando pa Defensa Integral di e Nacion y di e Organonan di Direccion pa Defensa Integral den tur estado y municipio di e pais.

Den estricto cumplimiento di articulo 51 di e Carta di Naciones Unidas, Venezuela ta reserva e derecho di ejerce legitima defensa pa protehe su pueblo, su territorio y su independencia. Nos ta convoca pueblo y gobierno di America Latina, e Caribe y di henter mundo pa movilisa den solidaridad activo frente na e agresion imperial aki.

Manera e Comandante Supremo Hugo Chavez Frias a bisa: “dilanti di cualkier circunstancia di dificultad nobo, di cualkier tamaño cu nan sea, e respuesta di tur patriota ta unidad, lucha, batalla y victoria”.