Aeropuerto di Bonaire ta logra record: Mei miyon pasahero den un aña!

KRALENDIJK - Bonaire International Airport a yega dialuna pa prome biaha den su historia na e punto di 500.000 pasahero den un solo aña. E pasahero en cuestion a yega riba e isla cu un buelo di KLM for di Schiphol, unda nan a ricibi’e cu regalo y bolo. “Yega e limite aki di mei miyon pasahero ta un resultado bunita,” segun Giordano Molina, director operacional di e aeropuerto.

“Esaki ta refleha e desaroyo positivo di Flamingo Airport den e añanan pasa. Danki na cooperacion fuerte cu companianan aereo y partnernan den e sector turistico, y e confianza cu pasaheronan tin den Bonaire como destino, nos ta sigui logra un crecemento saludabel”

Bonaire tin conexion aereo cu diferente isla, Norte America y Hulanda. KLM, TUI fly y Corendon Dutch Airlines ta activo riba e isla.