Merca kier intercepta un barco atrobe banda di costa di Venezuela

WASHINGTON - Merca ta atrobe ocupa cu intercepta un barco banda di kust di Venezuela. Segun funcionarionan mericano, e ta trata di un barco petrolero cu ta riba e lista di sancionnan. Mas tempran awe, agencianan di noticia Reuters y Bloomberg a raporta riba base di fuentenan cu e barco tabata caba intercepta, pero e funcionarionan ta bisa solamente cu e barco ta wordo sigui. Esaki lo ta e di tres biaha den diez dia cu Merca ta confisca un barco. E barconan cu a wordo intercepta anteriormente tabata tambe barconan petrolero. E barco cu e ta trata awe ta navega, segun Bloomberg, bou di bandera Panames. Segun e agencia di noticia, e tabata navegando den awa internacional, pero e ta riba un lista di sancionnan mericano.

BLOKEO

E presidente mericano Donald Trump a anuncia e siman aki cu e ta introduci un bloqueo pa barconan petrolero cu ta bou di sancionnan mericano y cu ta navega di y pa Venezuela. For di e momento ey, hopi barconan petrolero a keda den awa Venezolano pa evita wordo confisca. E barco cu a wordo confisca ayera, despues cu e bloqueo a drenta na vigor, no tabata riba un lista di sancionnan mericano. Segun e mericanonan, e lo tabatin petroleo na bordo cu si ta bou di sancionnan mericano. E dos prome barconan petrolero tabata, segun Merca, involucra den “transportenan ilegal di petroleo pa sosten e red di droga narcoterrorista di e regimen di Maduro”.

“PIRATERIA INTERNACIONAL”

E presidente mericano Trump ta bisa cu e presidente Venezolano Nicolas Maduro ta lidera un cartel cu ta transporta droga na gran escala pa Merca. Expertonan ta bisa cu Merca ta exagera e rol di Venezuela den e suministro di droga. Venezuela a jama e confiscacion di barconan “un acto grosero di pirateria internacional”. Segun Maduro, Trump ta tras di petroleo, gas, oro y otro materia prima balioso di Venezuela.

Luna pasa, e mericanonan a monta un gran forza militar den e region. For di cuminsamento di september, Merca a bombardea docenas di botonan cu segun Merca tabata transporta droga. Den esaki, por lo menos cien hende a wordo mata. Trump ta bisa cu cu esaki e kier combati e trafico di droga y e fluho di droga pa Merca. No a wordo presenta ningun prueba cu e botonan realmente tabatin droga na bordo.