FAA (atrobe) ta declara henter area Venezolano como area di alto riesgo

WILLEMSTAD – E autoridad di aviacion di Merca, Federal Aviation Administration (FAA), a (bolbe)declara oficialmente henter e area Venezolano como un area di halto riesgo pa aviacion civil. Den e aviso di seguridad renoba NOTAM A0015/25, e FAA ta indica cu den e Maquetia Flight Information Region, cu ta cubri henter e aira di Venezuela, tin un deterioro claro den seguridad y un aumento evidente di actividad militar. E aviso di seguridad ta valido for di 16 di december 2025 te cu 19 di februari 2026.

RIESGO

FAA ta adverti cu e amenazan ta aplica pa tur halto, for di tera te sin limite, y no solamente pa avionan cu ta pasa riba e area. Segun e autoridad, avionan tambe ta corre riesgo durante e fase di yega y salida, riba aeropuertonan y incluso ora cu avionan ta para riba tera. Den e texto di e NOTAM ta wordo declara claramente cu e actividad militar aumentada den y rondo di Venezuela ta representa un amenaza potencial pa operacionnan di aviacion civil.