Merca ta impone sancionnan nobo riba famia di Nicolas Maduro y tankeronan di petroleo

WASHINGTON – Merca ta subi presion riba Venezuela cu sancionnan nobo cu ta dirigi riba tres primo di presidente Nicolas Maduro y riba seis tankero di petroleo cu ta transporta petroleo venezolano. Asina Reuters ta raporta. E medidanan aki ta bini na un momento cu Washington a reforsa su presencia militar den e region sur di Caribe, cerca di costa di e islanan ABC.

Segun Ministerio di Finanzas di Merca, e tankeronan ta involucra den practicanan di navegacion engañoso y no sigur, y ta genera entrada pa loke e departamento ta describi como “regimen narco-terrorista corrupto di Maduro”. E barkonan, incluyendo e H. Constance cu bandera di Panama y Lattafa, a transporta recientemente petroleo bruto for di Venezuela.

E medidanan nobo ta sigui un dia despues cu Merca pa prome biaha a confisca un carga di petroleo venezolano. Tabata trata di un barco cu autoridadnan mericano a stop cu apoyo di marina, wardacosta y FBI. Segun expertonan, e sancion riba e seis tanker nan por forma e base pa confiscacionnan nobo. Pesei, e riesgo pa companianan di navega cu ta transporta petroleo for di Venezuela ta sigui aumenta.

E tensionnan entre Washington y Caracas a subi rapidamente. E accionnan mericano a laga e prijs di petroleo subi y ta causa nerviosismo den e region. E presion mas halto ta pasa den mes area maritimo unda Corsou ta situa y unda e presencia militar mericano a wordo aumenta durante e ultimo simannan. E gobierno venezolano ta rechasa e acusacionnan y ta acusa Merca di kier un cambio di gobierno pa tuma control riba e reserva di petroleo di e pais.

Presidente Maduro a reacciona ayera durante un bishita na barrio Pinto Salinas na Caracas. El a bisa cu sancionnan anterior no a kibra su pueblo y a declara cu “ningun hende lo faya”. Funcionarianan mericano ta bisa cu mas operacionnan cu tanker ta wordo prepara.