Merca ta prepara supuesto guera cu Venezuela, mientras huez mericano ta autorisa benta di CITGO Venezuela

HOUSTON — Mientras cu Merca ta preparando pa un supuesto guera cu Venezuela pa por core cu e presidente di e pais, Nicolas Maduro, un huez mericano a autorisa e benta di accionnan di PDV Holding — e empresa madre venezolano di CITGO — na un afiliado di Elliott Investment Management. E  decision ta sigui su aprobacion e siman aki di un oferta di US$ 5.9 miyon pa e compania, den un subasta organiza pa Corte pa paga acreedornan relaciona cu Venezuela. Cu esaki, ta pone un luz diferente riba e interesnan cu Merca por tin real pa cu e cambio di poder na Venezuela.  E orden di benta ta e ultimo paso legal grandi pa finalisa un subasta cu a dura dos aña, cu ta apunta paga te 15 acreedornan cu tin reclamonan pa default di debe of expropiacion na e pais Sur Americano. Hopi ta pensa cu e intencion di Merca pa cu Maduro, por ta pa desvia di e noticianan petrolero andando aworaki. 

E caso a cuminsa cu un demanda introduci pa e minero Crystallex International Corporation contra Venezuela den 2017. Corte na Delaware a declara PDV Holding responsable pa debe di e pais, y a habri caminda pa mas di un docena acreedornan uni su reclamonan.  Oferta di e afiliado di Elliott — Amber Energy — ta inclui un acuerdo importante: paga US$ 2.1 miyon na hende nan cu tin un bono venezolano cai/presta default. Esey ta un punto clave cu a influencia Corte den su decision. 

Aunque tabatin obheccionnan y desafionan legal pa oferta di Amber — incluyendo parti di e acreedornan y e gobierno venezolano — e huez di Delaware, Leonard Stark, a revoca nan obheccionnan y aproba e oferta 

Segun e huez: “E consideracion cu lo wordo duna pa e cumprador den e acuerdo di compra di accionnan ta husto, adecua y razonabel pa e accionnan PDV Holding, y ta un prijs adecua segun termino di Sale Procedures Order.”  Si tur aprobacion regulatorio sigui, e benta ta spera di ta cla pa otro añaa. Entre nan cu lo ricibi ganashi for di e subasta ta companianan como e productornan di petroleo ConocoPhillips, Crystallex, Rusoro Mining, y e conglomeratonan industrial.  Segun Amber Energy, e no lo asumi ningun responsabilidad di debe di e compania madre original (PDVSA) of di gobierno venezolano. 

RECHAZO DI GOBIERNO VENEZOLANO

Pero e benta no ta sin conflicto. Gobierno di Venezuela, via su vice-presidenta y ministra di petroleo, Delcy Rodriguez, a declara publicamente cu nan ta rechasa e orden — nan ta cualifica esaki como “fraudulento” y “forza ”.  Representantenan legal di Venezuela, CITGO, su companianan madre y e minero Gold Reserve (oferta rival) a introduci apelacion den corte di apelacion di Terser Circuito pa desafia e decision.  E proceso ta pendiente aprobacion final di e Departamento di Tesoro di EEUU.