Seis isla hulandes ta firma acuerdo nobo pa fortalece agricultura y piscamento

ORANJESTAD - Representantenan di Aruba, Bonaire, Curaçao, Saba, Sint Eustatius y Sint Maarten a firma un Memorandum of Understanding (MoU) renoba pa fortalece cooperacion regional den agricultura, cria di bestia y piscamento den Caribe Hulandes.

E acuerdo ta forma parti di Dutch Caribbean Agriculture, Livestock and Fisheries Alliance (DC ALFA) y tin como meta mehora seguridad alimentario, reduci dependencia di importacion y promove practicanan sostenibel y resistente contra cambio climatico.

Pa Aruba, minister Geoffrey Wever a firma e acuerdo. Tambe lidernan di otro isla a participa den e ceremonia.

E MoU nobo ta basa riba e acuerdo original firma na 2023 y ta establece un marco di colaboracion te cu 2035. E plan ta inclui coordinacion regional, desaroyo di piscamento, crecimiento economico resistente y mas oportunidad pa hobennan y muhernan den sector primario.

Un punto importante di e acuerdo ta e intencion pa converti DC ALFA den un entidad legal independiente, pa fortalece gobernacion, haya financiamiento internacional y facilita proyectonan regional na largo plazo.

Durante e firma, vice-prome minister di Sint Maarten, Grisha Heyliger-Marten, a enfatisa cu cooperacion regional ta esencial pa fortalece seguridad alimentario y sostenibilidad economico den Caribe Hulandes.