Bermudez (AVP) ta busca claridad di Gobierno riba posible reapertura di frontera cu Venezuela

ORANJESTAD – Parlamentario Carlos Bermudez (AVP) a presenta un serie di pregunta por escrito na Prome Minister Mike Eman buscando mas claridad tocante un posible reapertura di frontera entre Aruba y Venezuela.

Segun Bermudez, recientemente diferente declaracion publico tocante e tema a provoca interes y pregunta den comunidad. E la indica cu varios ciudadano a acerca su persona buscando informacion mas concreto riba e estado actual di e proceso.

FRONTERA CERA DESDE 2019

E frontera entre Aruba y Venezuela ta cera desde 2019, y segun e parlamentario, cualquier decision pa habri esaki atrobe ta un asunto delicado cu mester tene cuenta cu factornan geopolitico, economico y di seguridad. Ademas, e la señala cu un decision di e magnitud aki no ta depende solamente di Aruba y Venezuela, sino cu tambe tin relacion cu posicionnan dentro di Reino Hulandes.

TRANSPARENCIA Y PREGUNTANAN

Pa haya mas transparencia, Bermudez a pidi Gobierno pa informa si ya a tuma luga reunionnan cu autoridadnan relevante di Venezuela y Hulanda tocante e asunto, y si tin plannan concreto actualmente pa reabri e frontera. Entre e preguntanan presenta, e parlamentario kier sa si Gobierno tin algun fecha preliminar pa un decision of reapertura, cua condicionnan mester wordo cumpli prome cu esaki por tuma luga, y si e medida eventualmente lo inclui tanto trafico aereo como trafico maritimo. Bermudez tambe a pidi aclaracion riba e principal obstaculonan cu ainda por ta retrasando e reapertura, especialmente considerando cu Corsou ya a reabri su frontera cu Venezuela algun aña pasa. Finalmente, e parlamentario a enfatisa cu cualquier reapertura mester wordo maneha cu cautela y preparacion adecuado, garantisando cu siguridad, estabilidad y bienestar di Aruba keda proteha den tur circunstancia.