Grupo di sindicato ta rechasa comparacion entre Aruba y otro paisnan den debate HOFA

ORANJESTAD – Diferente sindicato na Aruba a expresa nan preocupacion serio tocante e declaracionnan reciente di secretario di estado hulandes Eric van der Burg riba e propuesta di ley HOFA. Den un declaracion conhunto traha na hulandes, sindicatonan ta argumenta cu Aruba no por wordo compara simplemente cu Corsou y Sint Maarten riba tema di supervision financiero dentro di Reino.

Segun e sindicatonan, Aruba tin un posicion historico y constitucional unico dentro di Reino Hulandes, pasobra Aruba a haya su Status Aparte ya na 1986, hopi aña prome cu Corsou y Sint Maarten bira pais autonomo na 2010. Nan ta enfatisa cu Aruba nunca a wordo obliga na acepta supervision financiero via un ley di Reino como condicion pa su autonomia.

E organisacionnan laboral ta considera cu e idea pa “alinea” Aruba cu Corsou y Sint Maarten no ta un paso padilanti, sino un reduccion di e autonomia cu Aruba a conkista desde 1986. Nan ta bisa cu Status Aparte precisamente ta representa un posicion separa y independiente dentro di Reino.

E sindicatonan tambe a señala cu Aruba den e ultimo añanan a logra mehora considerablemente su maneho financiero sin supervision structural di Reino, y pa nan, esaki ta mustra cu pais a demonstra responsabilidad suficiente pa mantene autonomia den su finanzas publico.

Den nan conclusion, sindicatonan ta insist i cu igualdad dentro di Reino no mester significa elimina diferencianan historico y constitucional entre e paisnan, pero mas bien respet pa posicion unico di cada pais dentro di Reino Hulandes.