Bario Mabon y Fundacion Luna ta busca solucion pa problema di cacho

ORANJESTAD – Comision di Desaroyo y Bienestar di Bario Mabon y Fundacion Luna a uni forsa pa atende problema di cacho den comunidad. Durante un recorrido den e bario, nan a identifica diferente area unda cachonan ta crea preocupacion pa seguridad y bienestar di habitantenan.

Fundacion Luna a indica cu tin un necesidad grandi pa mas educacion y apoyo tocante bienestar animal, especialmente pa cachonan cu ta biba riba caya of na cadena. E fundacion tambe a anuncia un campaña di sterilizacion y castracion den luna di juni enfoca riba famianan cu mester asistencia cu cuido di bestianan di cas.

Segun e comision, e colaboracion no solamente ta yuda atende e problematica di cacho, pero tambe ta fortalece seguridad y convivencia den comunidad.