Analisis: Prioridadnan inverti: e frustracion silencioso cu hopi Arubiano ta sinti

Scirbi pa Tito Laclé

Tin un sentimento cu ta bira cada biaha mas fuerte den Aruba: cu hopi discusion politico y publico no ta conecta cu loke e hende comun realmente ta sinti den bida diario. Un post riba rednan social cu mi a mira, segun mi ta refleha exactamente e frustracion ey. E post ta referi na e hecho cu no necesariamente e ley di HOFA no ta importante, of cu asunto manera e-stepnan, scooternan electrico of inversion privado no merece atencion. Pero e punto principal ta otro: prioridad.

Aruba ta un isla chikito cu problemanan grandi. Ora pueblo ta mira violencia aumentando, tiramento riba caminda publico, atraconan, trafico fuera di control, costo di bida halto, y un inseguridad social cu hopi hende ta sinti, pero despues ta mira cu gran parti di e discusion nacional ta concentra riba otro tema, naturalmente tin un sentimento di desconexion.

E frase “e generacion cu tin awo no tin niun idea ken ta bisando e berdad” ta refleha un cansancio colectivo. No solamente cu politica, pero tambe cu informacion, propaganda, social media y polarizacion. Hende ta sinti cu tur banda tin un “agenda”, pero poco hende ta papia cla y directo den idioma cu e pueblo ta comprende. Y ey e ta crea desconfianza.

Un otro punto importante den e texto, ta e comparacion entre regulacion y realidad. Aruba ta dedica hopi energia na prohibicion , regla y debate legal, mientras cu den percepcion di pueblo, criminalidad y uso di arma toch ta sigui aumenta. Ora un turista por mira un tiramento of violencia den plena area turistico, hopi hende ta puntra nan mes: “Esaki no ta mas urgente?”

E feeling general cu hopi ciudadano tin awo, ta cu gobierno y lidernan politico ta reacciona mas rapido riba cosnan visibel of mediatico, mientras problemanan structural ta dura añanan sin un solucion profundo. Esaki ta crea cynismo. Hende ta perde fe cu e sistema realmente ta trahando pa nan bienestar.

Pero tin e otro banda tambe. Aruba ta un pais chikito cu recurso limita. Gobierno ta constantemente den posicion pa “ paga candela” den diferente area na mes momento. Seguridad, finansa publico, turismo, infrastructura, salud y presion internacional tur ta choca hunto. Y mei mei di tur esey, cada decision ta bira uno politico.

Loke realmente ta sali for di e tipo di mensahe aki, ta un pueblo cu kier mas balance. Mas sentido comun. Mas prioridad riba seguridad basico, convivencia social y stabilidad. Pueblo kier sinti cu nan preocupacion diario ta wordo scucha, no solamente e tema cu ta domina e conferencia di prensa of debate politico.

E peliger pa Aruba no ta solamente e problema mes. E peliger ta ora e ciudadanonan cuminsa sinti cu nan no ta wordo representa ni comprendi. Paso na e momento ey, e distancia entre pueblo y liderazgo ta bira mas grandi. Y riba un isla chikito manera Aruba, confianza social ta un di e cosnan mas importante cu tin.