ImSan a inicia buskeda pa un director nobo

SAN NICOLAS – Instituto Medico San Nicolas (ImSan) a  oficialmente  habri e vacante pa Director nobo, despues cu e director Joel Rajnherc a fayece. E ta un posicion cu lo hunga un rol clave den direccion strategico, operacional y clinico di e hospital. Segun e anuncio oficial publica, ImSan ta busca un candidato cu vision, experiencia y capacidad di liderato pa guia e instituto den e siguiente fase di desaroyo.

Den e descripcion di e funcion, ImSan ta enfatisa cu e director lo tin responsabilidad general riba operacionnan hospitalario, maneho financiero, desaroyo di politica organizacional y mehoracion continuo di servicio medico. Tambe lo mester representa e organizacion tanto internamente como externamente y mantene contacto cu diferente actor den sector di salud na Aruba.

Entre e responsabilidatnan principal, e director lo mester sigura cu e hospital ta cumpli cu regulacionnan medico, protocolonan di salud y standardnan di calidad. Tambe lo mester guia innovacion y desaroyo di servicionan medico pa responde miho na necesidadnan cambiante den cuido di salud.

ImSan ta pidi cu candidatonan tin un grado academico relevante, manera un master den medicina, salud publico, management of derecho. Ademas, ta busca un persona cu amplia experiencia den administracion di salud, fuerte habilidadnan organizacional y capacidad pa tuma decisionnan etico.

E anuncio tambe ta pone enfasis riba liderato, comunicacion y compromiso cu calidad y desaroyo organizacional. Un requisito importante ta cu e director nobo mester ta residente na Aruba.

Segun e aviso, e pakete salarial lo wordo determina conforme e Landsverordening Normering Topinkomens (LNT). Persona interesa por manda curriculum vitae y carta di motivacion prome cu dia 11 di juni 2026.

Cu e convocatoria aki, ImSan ta pone cla cu e instituto kier sigui fortalece su posicion den sector medico di Aruba, mientras cu ta busca un lider cu por guia e hospital den un tempo di cambio y crecimiento den cuido di salud.