Declaracion di van der Burg ta crea controversia politico entre Aruba y Hulanda

ORANJESTAD – Declaracionnan reciente di secretario di estado hulandes Eric van der Burg durante un entrevista cu e medio local EANEWS a causa reaccionnan fuerte tanto na Aruba como den Hulanda, especialmente den medio di debate continuo tocante e acuerdo administrativo (OvA) y relacionnan dentro di Reino Hulandes y e ley di reino HOFA.

PREFERENCIA POLITICO

Den e entrevista, Van der Burg a bisa claramente cu e  no tin preferencia politico tocante cua  gobierno ta na poder na Aruba. Segun e mandatario hulandes, e no ta tuma posicion entre partido di prome minister Mike Eman of e partido di ex-prome minister Evelyn Wever-Croes. “Mi no tin opinion riba cua  gobierno ta na poder na Aruba. Esey ta decision di elector di Aruba,” Van der Burg a declara.

FORTALESA CRITICA

Sin embargo, diferente partido di oposicion na Aruba a usa e declaracionnan aki pa fortalece nan critica contra gobierno actual y e negociacionnan cu Hulanda. Segun algun politico, e entrevista por wordo interpreta como confirmacion cu Hulanda ta sigui tin influencia grandi riba decisionnan politico y financiero di Aruba. Di otro banda, for di Hulanda ta argumenta cu parti di e declaracionnan a wordo saca for di contexto. Segun fuentenan hulandes, Van der Burg tabata principalmente splica e contexto historico y constitucional di Aruba dentro di Reino, y no un posicion politico contra of na favor di algun partido.

TRATAMENTO IGUAL

Den e entrevista, Van der Burg a enfatisa cu Aruba, Corsou y Sint Maarten mester wordo trata igual dentro di Reino Hulandes. E la splica cu Aruba historicamente tabatin un “status aparte” hopi prome cu Corsou y Sint Maarten bira paisnan autonomo na 10 di october 2010. Segun Van der Burg, e diferente regulacionnan cu actualmente tin pa Aruba compara cu Corsou y Sint Maarten ta resultado di e proceso historico aki. E la bisa cu e actual acuerdo administrativo ta busca precisamente pa “iguala” Aruba cu e otro dos paisnan caribense di Reino. “Aruba, Corsou y Sint Maarten ta igual pa nos. Tur tres ta paisnan hermano dentro di Reino,” el a declara.

DISCUSION POLITICO 

E comentario aki a provoca mas discusion politico, specialmente paso diferente sector na Aruba ta mira e acuerdo cu Hulanda como un tema sensitivo cu toca autonomia, soberania y relacionnan financiero entre Aruba y Hulanda. Mientras cu e controversia ta sigui crece, a compronde cu diabierna awor,  e mandatario hulandes lo ofrece mas aclaracion na prensa tocante su declaracionnan y e contexto den cual nan a wordo expresa. Politiconan y observadornan tanto na Aruba como na Hulanda ta spera cu e aclaracion lo yuda baha e tension politico cu a surge despues di publicacion di e entrevista. Por lesa e declaracion textual di vd Burg AKI.