Arends-Reyes(AVP): Modernisacion di LNT ta clave pa retene talento local

ORANJESTAD – Lider di fraccion di AVP, Jennifer Arends-Reyes, ta sostene cu Aruba mester modernisa e Landsverordening Normering Topinkomens (LNT) pa retene profesionalnan local y fortalece institucionnan publico.

Segun Arends-Reyes, hopi talento altamente capacita ta busca mihor oportunidadnan den exterior, mientras Aruba ta enfrenta competencia internacional pa atrae y retene experto den sectornan strategico manera salud, enseñansa y tecnologia.

E parlamentario a enfatisa cu e meta no ta pa promove salarionan excesivo, sino pa adapta e ley na realidad economico actual y crea un sistema salarial mas competitivo y balancea. E la menciona cu na Hulanda e version hulandes di e ley ta wordo actualisa regularmente, mientras e maximo salarial den Aruba a keda igual desde 2022.

Arends-Reyes a conclui cu transparencia y responsabilidad fiscal mester sigui prioridad, pero cu Aruba tambe mester crea oportunidad pa su propio talento por keda y contribui na futuro di pais.