PPA kier prepara Aruba pa futuro di Inteligencia Artificial

ORANJESTAD – Fraccion di PPA, lidera door di parlamentario Eduard Pieters, ta enfatisa cu Aruba no por keda atras mientras mundo ta cambia rapidamente cu Inteligencia Artificial (AI). Den cuadro di “Plan Nos Aruba 2050”, PPA a organisa un encuentro informativo pa Centronan di Bario hunto cu experto nan sr. Waslander y sr. Bislip pa introduci comunidad na mundo di AI.

Segun Pieters, Inteligencia Artificial ya ta forma parti di bida diario y Aruba mester prepara su pueblo pa e realidad nobo aki. E encuentro a enfoca riba con AI por yuda den educacion, negoshi, productividad y desaroyo comunitario.

PPA kier converti Centronan di Bario den centronan di conocemento y innovacion, unda muchanan, hobennan, adulto mayor y entrepreneur por sigui siña y adapta nan mes cu e cambionan tecnologico.

Durante e sesionnan a discuti con AI por yuda negoshinan chikito y mediano mehora servicio, crea business plan y aumenta creatividad y eficiencia. Pieters a enfatisa cu educacion y conscientisacion ta esencial pa usa tecnologia cu responsabilidad.

Segun PPA, educacion no mester limita solamente na scol, pero mester continua den comunidad y den bida diario. Pieters a conclui cu Aruba mester prepara su comunidad y futura generacion pa un mundo nobo cu ya ta presente awe.