FLP: Papiamento ainda ta lucha pa su existencia na Aruba

ORANJESTAD - Fundacion Lanta Papiamento (FLP) a celebra 23 aña di oficialisacion di Papiamento na Aruba, destacando cu apesar di e echo cu idioma tin status oficial desde 2003, ainda tin hopi lucha pa logra reconocemento completo y uso amplio den sociedad y den Reino Hulandes.

FLP a reconoce algun progreso den enseñansa, manera introduccion di Papiamento como materia obligatorio y idioma di alfabetisacion den scolnan basico, pero a critica cu e sistema educativo ainda ta enfoca principalmente riba siña Hulandes en vez di duna muchanan educacion den nan idioma materno. Segun FLP, esaki ta un forma di discriminacion contra mucha y pueblo di Aruba.

Fundacion tambe a expresa preocupacion cu Ingles ta gana mas influencia den prensa, comercio y media social, mientras uso correcto di Papiamento ta bira mas limita.

Como parti di celebracion, FLP lo organiza “Papiamento den Hofi” dia 27 di mei na Arubiana, cu actividadnan cultural manera poesia, musica, charla y contamento di storia, invitando comunidad pa mustra amor y sosten pa preservacion di Papiamento.