LOS ANGELES – Gobernador di estado Mericano di California a critica e reacciona laat di polis riba un confrontacion entre demostrantenan rival riba University of California  (UCLA). Un grupo pro Israel a invadi un campo di tent di demonstrantenan pro Palestina riba e campus di e universidad. Polis lo a reacciona apenas algun ora despues, cual e gobernador Gavin Newsom a yama un reaccion ‘limita y laat’ y inaceptabel di parti di polis. Varios otro ciudad tambe ta tin studiantenan universitario protestando awe riba e tema di e guera na Gaza actualmente.  .

BOGOTA – Presidente di Colombia Gustavo Petro a kibra relacion diplomatico cu Israel entrante awe 2 di mei. Esaki e la anuncia un dia prome durante un discurso. E presidente ta contra e accionan di Israel na Gaza, Y ta sostene esnan di Palestina. 

AMSTERDAM – E morto violento di e Arubiano Johnny Ponson (65) na Amsterdam e siman aki ta yen di pregunta ainda. Asina ministerio publico ta raporta. E homber a wordo haya diasabra ultimo morto den su camber den e flat Gravenstein den Bijlmer. “Nos tin hopi pregunta ainda riba e victima y su bida”  Folkert van Dekken, cu ta lidera e ekipo di recherche investigando e crimen. “E no tabata sali hopi, pero tabata hopi servicial cu su bisiñanan. E tabata yuda nan cu nan papel di impuesto. E tabata pensiona pero ta yuda hende si. E tabata biba su so, pero tin 3 yiu cu dos muher. Riba e diasabra mainta di e suseso, un conoci di Ponson a sinti algo straño. “E victima a bestel cuminda den siman, pa busca den fin di siman. Pero e no a bin. Un otro amigo tabatin un cita cu ne e diasabra ey. E la bishite diadomingo pero ningun hende a contesta, cu ta straño pasobra semper e tabata na cas. E la alarma polis e ora cu a haya e curpa. Mientras cu Ponson tabatin algun dia morto, no ta conoci ainda cuanto dia. 

HUNTINGTON, W.Va. –  John Christopher Spence, 67, a keda sentencia ayera na Merca na 5 aña di prueba federal, incluyendo 6 luna di aresto na cas cu banchi di control GPS, y multa di 5 mil dollar. Tur esaki pa a haci declaracion falso di bancarota. Spence a paga pasashi pa e.o. un vacacion pa Aruba, a disfruta na Aruba, y ora a bolbe a haci un declaracion falso di ta bancarota. E la admiti cu e la haci compra di e.o. e pasashi pa Aruba, asabiendas cu e lo a declara bancarota despues. E la haci esaki cu intento pa defrauda su creditornan pa medio di e proceso di bancarota. Algo cu na Merca ta castigabel pa ley.  

ROSEAU – Corte supremo di Dominica a rechasa e prohibicion riba homosexualidad, y ta considera esaki no constitucional. E prohibicion ta data desde e tempo cu Inglatera tabata manda riba e isla. Segun Corte Supremo di e isla, e prohibicion riba homosexual ta viola derechonan fundamental. E caso a keda entama pa un habitante homosexual no identifica di e isla. Despues di 5 aña den corte, tabatin un sentencia porfin.  E isla ta e di 5 den Caribe cu ta invalid un ley colonial prohibiendo homosexualidad. Trinidad and Tobago, St. Kitts and Nevis, Antigua y Barbuda, y Barbados tabata e islanan prome cu Dominica cu tambe a haci e mescos, esta elimiona prohibicion contra homosexualidad. Jamaica y St Vincent & The Grenadines tabata menos exitoso den esaki. Interesante ta e hecho cu e articulo unda cu esaki a keda raporta, ta haci mencion di e caso pendiente na Aruba y Corsou pa matrimonio di mesun sexo. E ta haci mencion di e veredicto pendiente fin di luna di mei, di e tema aki.  

BRUSELAS – Union Europeo ta preocupa cu e tarea di Facebook y Instagram pa eleccion di Parlamento Europeo proximamente. E comision Europeo tin tur atencion riba e gigante di red social META, cas di Facebook. Tin preocupacion cu e medidanan cu e gigante META a tuma rond di e eleccion Europeo, no ta suficiente. E urgencia pa e investigacion ta grandi, ya cu ta aki un luna tin eleccion caba. E miedo ta entre otro e plamamento di  desinformacion Ruso via propaganda, y e opresion  di desinformacion politico via di propaganda, y e forma con pa monitoria loke ta aparece riba Facebook y Instagram. Meta no a reacciona ainda riba esaki.