Compania di accounting WTS a uni cu BDO International

Compania di accounting WTS a uni cu BDO International

Posted on 05/9/2017 9:58 am AST | Updated on 05/9/2017 3:11 pm AST

ORANJESTAD - Dos compania di accounting BDO y WTS a uni. Dialuna a tuma lugar e acto ceremonial di firmamento entre WTS y BDO International. Pa WTS tabata presente Cari Wolter, Frank Snijders y Jamil Tromp y BDO International a wordo representa door di Martin van Roekel, CEO y Jeannot Evers Partner den accountancy di BDO Hulanda a acompaña nan pa e ocacion. Durante e ceremonia, Wolter ta splica cu den e ultimo 10 añanan, WTS a crece y transforma su mes den un di e companianan mas dinamico y renombra den e ramo di “belasting, accountancy & advisory” na Aruba. Esaki ta danki na tur e cliente nan pa e gran apoyo y confianza deposita den WTS, y e dedicacion continuo di e coleganan. Pa cual motibo nan ta supremamente agradeci.

“Den un mundo asina dinamico y cu tanto cambio, y den cual desaroyo nan riba mercado local y internacional ta tuma lugar asina lihe, a pone nos evalua nos strategia di compania. Un evaluacion cu meta principal pa hiba nos na e siguiente fase di evolucion di nos organisacion pa sigui garantisa mihor servicio. Ta pa e motibo aki y cu inmenso placer y honor nos ta anuncia cu WTS a haya e licencia exclusivo pa opera como BDO na Aruba ” Wolter a enfatisa.

BDO mundialmente ta den e top compania nan mas grandi den e ramo di “belasting, advisory & accountancy”. BDO tin presencia den 158 pais y un staff di 67.700 profesional dedica trahando den mas cu 1.400 oficinanan rond mundo.

“BDO ta conoci pa su enfoke personal pa cu empresanan chikito y mediano. BDO no ta impone reglanan riba nan miembro nan, nos strategia ta pa respeta e cultura local di maneho di negoshi den cada pais y pa stimula e partnernan pa tuma decision strategico basa riba merito specifico di e mercado local”, asina Sr. Martin van Roekel a remarca.

Pa es motibonan aki WTS a tuma e decision di uni forza cu BDO, combinando di e forma aki “lo mihor di dos mundo” pa ofrece Aruba y tur cliente di WTS e miho experiencia den servicio.

Jamil Tromp “ Nos ta firmemente convenci cu BDO pa nos ta un paso esencial pa ofrece mas innovacion y eficiencia cu servicio di calidad superior pa nos clientenan y manteniendo nos toke personal pa cual WTS a resalta semper riba mercado, dunando servicio de calidad halto. E dedicacion y compromiso cu WTS ta conoci pe cerca su cliente nan lo keda manteni” asina e la conclui.

WTS a “rebrand” recientemente den BDO-WTS y ta celebra e acto aki, awe tardi diamars 9 di mei. E celebracion aki lo ta conhunto cu coleganan, clientela y otro invitadonan. Su Exelencia Gobernador di Aruba Sr. Alfonso Boekhoudt lo honra BDO-WTS cu su presencia y alaves lo inaugura oficialmente e edificio nobo situa na L.G Smith Boulevard #26. Un edificio iconico, historico den Oranjestad modernisa y renova di un forma “Eco friendly”, unda su interior ta decora cu “artwork” di Aruba su fauna, flora y edificio nan monumental y historico.

Pa e apertura di e edificio nobo nos ta informa cu e caminda lo ta bai ta cera Diamars 9 di mei for di e crusada di Adriaan Lacle BLVD te na e crusada di Schumannstraat di 3pm te cu 11pm.

  • Powered by SETAR