DCA: No ta necesario ainda pa revoca licencia di Aruba Airlines

ORANJESTAD – No ta necesario ainda pa revoca e licencia di Aruba Airlines, manera hopi ta bin ta bisa. Asina director di Directie Luchtvaart Edwin Kelly a bisa NoticiaCla.com awe. E modificacionnan cu (DCA) ta manda pa e.o. Aruba Airlines, y cu a sali den prensa (incluyendo NoticiaCla), no ta nada nobo.  Kelly ta lamenta cu e asunto a sali den prensa. “Como Directie Luchtvaart ta haci nos toezicht, nos trabou di supervision contra e aerolineanan” Kelly a bisa. Y manda un carta manera cu a sali recientemente, ta un di nan heramientanan. “Nos tin otronan cu nos ta manda, pa sigura cu aviacion di Aruba ta safe y ta keda safe tambe” Kelly a bisa. Como tal, si un aerolinea (ainda) ta bulando, ta pasobra DCA ta consider'e como ‘safe’.

ARUBA AIRLINES SU AOC

A haci mencion cu pa falta cu e aerolinea Aruba Airlines falta cierto persona na cierto funcion (postholders) manera cu e portal aki a raporta recientemente, nan no merece nan licencia (AOC) y cu DCA mester revoca esaki. Pero segun Kelly, hopi hende cu ta comenta esey, ta haci esey sin tin tur informacion cu nan tin pa haci analisis. Y segun Kelly, si no a revoca nan licencia ainda, ta pasobra ainda no ta necesario pa haci tal. “Si un dia elo ta necesario, nos lo haci’e tambe, pero si e no a wordo haci, kiermen cu ainda e no ta necesario” Kelly a finalisa bisando. E medidanan cu nan a tuma recientemente, ta parti di nan ‘oversight regular’ cu nan tin, y ta e interaccion entre e autoridad y e industria di aviacion. Scucha e entrevista AKI.