Hopi retiro a cay na Aruba Airlines den ultimo lunanan

ORANJESTAD – Mientras cu tin indicacion cu e compania no tin problema cu placa localmente, for di januari pa awor e aerolinea Aruba Airlines lo a kita entre por lo menos 20 persona localmente, mayoria Arubiano y for di posicion clave. A kita algun piloto, hefe di seguridad (safety), marketing algun den mantenimiento, y asina tin mas. Un training manager nan kier a haci COO di e compania, y tin varios persona cu ta traha na nan postnan den exterior manera Valencia, Maracaibo y Miami. Informacion cu e portal aki tin ta cu esnan cu a wordo kita den exterior, ta pa motibo di placa, pero aki na Aruba esey no necesariamente ta e caso.

POST HOLDERS

Problema ta cu aworaki falta por lo menos dos ‘post holders’ (posicion clave cu e compania mester tin ocupa semper pa sigura nan licensia). Entre nan, lo a kita e flight operations officer cu ta un post holder. Lo tin keho contra un di e hefenan, Estaban Valles cu lo mester ta sacando varios Arubiano, y posiblemente reemplasando nan cu personal di Venezuela. Tur tin cu reemplaza e Arubianonan cu recientemente (for di comienso di aña) a wordo kita. E asunto ta cu tin hopi cos ta pasando na e aerolinea, cu supuestamente no ta corecto y bayendo bon.

AYUDO DI PAWA

E aerolinea dominicano PAWA ta yudando e aerolinea di Aruba, y hunto cu Aserca a bula e buelonan di e avion di registro P4AAA ora cu esaki a daña. Ademas ta e mesun PAWA lo a paga e control di mantencion (C-check) cu ta algo hopi costoso y cu por facilmente core den centenares di miles di dollar (entre 500 pa 600 mil dollar). Ta bon pa sa tambe cu e persona clave tras di PAWA y Aserca ainda ta e conocido Simeon Garcia, cu den pasado a maneha Air Aruba y cu ta bisa cu a causa e ciere di e aerolinea. Negoshi entre PAWA y aa a wordo haci cu e avion p4-aaa a wordo pinta cu logo di PAWA pasobra lo bula pa nan Santo Domingo-Miami y sin consentimento di DCA (Directie Luchtvaart). Tambe nan a cambia un avion tipo MD pa e Airbus 320 pa bula ruta nan mas cortico entre e islanan.

DCA

Informacion cu e portal aki tin ta mustra cu den raport di e inspectornan di DCA traha riba e situacion na Ariba Airlines siman pasa, nan a pone cu e situacion financiero ta malo.