• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Dos siman pasa despues cu a prohibi nan ‘per direct’, awe tur e-step ta bek riba caminda

ORANJESTAD – Loke a cuminsa como un accion fuerte di gobierno pa pone orden riba caminda publico dos siman pasa, a termina den un buelta ‘inespera’: tur e e-steps, scooters y otro vehiculonan similar cu a wordo prohibi y despues hasta recogi, awor ta bek riba caminda como si nada a pasa. Y e ‘inespera’ ta entre comillas pasobra esaki tabata di spera. Cinco dia despues cu a haci henter un show di piki e-steps, tur e camindanan cu a piki nan, nan ta netchi geparkeerd atrobe, cla pa uso di cualkier turista of usuario local. Noticiacla a sigui e show dos siman pasa, y awe nos a nota cu e stepnan ta bek. Tur! 

E PROHIBICION

Net dos siman pasa awe, minister di Husticia Arthur Dowers a anuncia un maneho duro: tur e vehiculonan aki tabata ilegal riba caminda publico y mester desaparece mesora. E decision a wordo sigui cu accion concreto, cu polis y autoridadnan a bai hasta recohe e vehiculonan físicamente, manda un mensahe cla cu gobierno finalmente lo actua despues di añanan di descontrol.

CORTE A INTERVENI

Pero e situacion a cambia drasticamente ora corte a interveni. Segun e desaroyo reciente, e medidanan a wordo suspendi temporalmente, te ora cu casonan legal pendiente haya un sentencia definitivo. Resultado: tur e vehiculonan cu a wordo kita for di caminda, a bolbe, y e situacion ta parse cu a reset.

UN SETBACK PA GOBIERNO

E paso atras aki ta un golpi fuerte pa credibilidad di gobierno. Despues di anuncia un prohibicion “per direct”, implementa y hasta ehecuta e medida, e realidad awor ta mustra cu e base legal no tabata suficiente fuerte pa sostene e decision den corte.

E situacion ta pone pregunta serio: con un politica tan drastico por wordo anuncia y ehecuta sin cu e base legal tabata completamente solido? Y ken ta responsabel pa e desorden institucional cu awor ta resultando? No tabatin ningun consehero huridico cu por a premira e consecuencia aki? Noticiacla a puntra e mandatario durante e conferencia caba, si no ta kere cu esaki ta bay causa problema legal? Nos a wordo bisa cu, tur hende tin derecho di bay corte. 

CONFUSION RIBA CAMINDA

Pa e ciudadano y usuario di caminda, e mensahe ta completamente confuso. Un dia e vehiculonan ta ilegal, otro dia nan ta permiti atrobe. E tipo di inconsistencia aki no solamente ta mina confianza den autoridad, pero tambe ta crea inseguridad den trafico, pasobra no tin cla riba kico ta permiti y kico no. Gobierno mes a reconoce anteriormente cu e problema di e-steps tabata serio, cu falta di control y comportamiento peligroso tabata pone seguridad publico na riesgo. Pero sin un marco legal cla y sostenibel, tur intento di enforcement ta keda debil.

Resultado final: ningun hende no a gana (ainda)

Den e estado actual, ni gobierno, ni empresario, ni comunidad no ta gana. Empresarionan a pasa door di perdida temporal, gobierno a perde autoridad, y comunidad a keda cu e mesun problema riba caminda.

KICO MESTER PASA AWOR?

E caso aki ta laga un les cla: Aruba no por sigui traha cu reaccion sin fundacion legal fuerte. Un show of forse, cu ta mustra como un capricho, gubernamental. 

Pa logra un solucion real, tin tres paso esencial:

Ley cla y actualisa: Defini exactamente unda y con e vehiculonan por circula.

Enforcement consistente: Polis mester actua riba un base legal cu no por wordo tumba facilmente.

Politica  structural: No djis prohibi, pero crea alternativa (area designa, regulacion di rental, licencia, etc.).

UN PRUEBA DI GOBERNACION

E situacion di e-step a bira mas cu un tema di trafico — e ta un prueba di con Aruba ta maneha gobierno, ley y enforcement.

Si gobierno no corrigi e rumbo rapidamente, e riesgo ta cu e isla lo sigui den un ciclo di anuncio fuerte, accion rapido… y despues retroceso for di corte. Y mei mei di tur esey, e caminda ta keda sin control.  Y tur otro cos cu si ta mas importante pa actua, tambe ta keda un banda,  ta warda, te ora cu ta mucho laat.