Formador Jetten kier forma gabinete rapido y kier ta riba e bordes riba 23 di februari

DEN HAAG -  Conseho di Minister di Hulanda diabierna a duna su aprobacion na e asina yama Woningwet BES, osea e ley di vivienda. E propuesta di ley aki tin como meta pa cuida pa e construccion di mas cas di huur social y pagabel riba e islanan BES (Bonaire, Sint Eustatius y Saba), door di duna fundacionnan di vivienda riba e islanan un mehor acceso na financiacion. E propuesta di ley a pasa zomer pasa den consulta via internet y awor ta wordo manda pa conseho na Raad van State. Despues di esaki lo sigui e tratamiento den Tweede Kamer y Eerste Kamer. Cu e ley nobo, fundacionnan di bivienda por haci un peticion pa ricibi un status oficial como institucion autorisa. Cu esaki nan ta bini bou di supervision di Autoriteit Woningcorporaties. Asina nan por participa den Waarborgfonds Sociale Woningbouw, cu ta garantisa prestamo y ta haci financiacion cu interes mas abou posible.

DEN HAAG – Mientras cu algun ora prome, tabata conoci solamente cu e partido VVD lo produci e proximo secretario di estado pa Asuntonan di Reino, reemplasando asina Eddie van Marum, awor a bira conoci segun VVD mes, cu Eric van der Burg ta haya e cartera ey. E no ta un desconoci pa nos ya cu e la bishita Aruba caba na october 2023 como secretario di estado pa Asilo y Migracion, y te hasta a bira malo y keda hospitalisa brevemente ora cu e lo a shuata durante di un bishita na Aruba. E tempo ey, su vocero a confirma pa Noticiacla cu enberdad e la bira malo y cu e tabata hospitalisa brevemente. Ora cu e la bolbe Hulanda, e la retira temporalmente, pa recupera. 

DEN HAAG – E ministerio di Asuntonan Interior y Relacionnan di Reino lo cay como un cartera coherente na CDA, cu ademas un secretario di estado pa Relacionnan di Reino y Gobierno Efikas for di VVD. E nombernan mes ainda no ta conoci y lo keda publica despues. VVD ta ricibi e ministerio di Husticia y Seguridad y e ministerio di Infraestructura y Awa. E ministerionan di Agricultura y Educacion ta bay pa D66.

AMSTEL - E Conseho di Directiva di Air France-KLM a aproba e nominacion di Marjan Rintel como President y Director General di KLM pa un segundo termino di cuatro aña, segun KLM a informa dialuna anochi. E re-nominacion ta sigui riba proposicion di e Conseho di Supervision di KLM y di e Director General di Grupo, Benjamin Smith. Director di Operacion, Maarten Stienen, a indica cu e no ta aspira na un segundo termino di nombramento. E Conseho di Supervision di KLM ya a informa e Conseho di Empleadonan tocante esaki. E confirmacion definitivo di e proposicion lo tuma lugar durante e reunion di accionistanan di KLM. Marjan Rintel ta cumpli e funcion di President y Director General di KLM dede 2022 y a sigui Pieter Elbers, cu a mester laga su posicion segun Smith, pasobra el no tabata riba mes linea cu e direccion di grupo y tabata sigui mas su propio curso. Elbers tabata conta cu apoyo fuerte di e personal di KLM, cu tabata tene el den alto estima.

DEN HAAG – Un Plataforma di Crecemento Economico Caribeño cu mester wordo establece ainda, lo tin como proposito pa stimula e desaroyo economico y innovacion di e seis islanan den e parti Caribeno di e Reino. Partidonan politico hulandes D66, VVD y CDA a inclui esaki den nan acuerdo di coalicion presenta diabierna cu e titulo “Aan de slag”. Ademas, lo pone 30 miyon euro disponibel di manera structural pa trata e problematica di pobreza den Caribe Hulandes y pa continua implementa e recomendacionnan di e Comision Social Minimo.

DEN HAAG - E coalicion di D66, VVD y CDA kier “traha riba un Hulanda miho”. “Nos ta kere cu e sociedad kier atrobe un politica cu ta mustra cu, cu otro   ta logra mas cu contra otro,” asina   e prologo di Jetten (D66), Yesilgoz (VVD) y Bontenbal (CDA) a bisa diabierna.