- Partido MEP kier ruenion cu minister Wever relaciona cu guera na Medio Oriente
- Un dia despues di a huramenta na Aruba, minister Mildred Schwengle a yega Hulanda
- ANALISIS: 40 aña despues: Status Aparte ainda ta un campo di bataya politico
- Presidente di CAFT ta invitado den programa Noticiacla LIVE awe nochi
- Parlamentonan di islanan CAS ta lanta comite riba conflicto den Reino hulandes
PVV ta insisti: Corsou, Aruba y St. Maarten mester bira independiente
DEN HAAG – Den opinion di partido PVV e paisnan den Caribe, Corsou, Aruba y St. Maarten mester bira den futuro completamente independiente. Esaki ta nifica cu e paisnan mester carga nan propio responsabilidad y percura cu finansa publico ta den orde. No mester stens mas riba ayudo financiero for di Hulanda.
Asina parlamentario Peter van Haasen a bisa den un debate e siman aki den Comision di Relacionnan den Reino di Parlamento hulandes. Mientrastanto e paisnan ta parti di Reino hulandes ainda, y tin casonan di mal gobierno, corrupcion y caos financiero, Hulanda no por bira cara y wak den otro direccion. Pa es motibo aki ta necesario cu tin supervision y percura cu e paisnan por para realmente riba nan pia.
Meta ta pa alsa nan grado di autosuficiencia pa asina haci posibel cu por laga e paisnan lòs. Na momento cu un pais keda posiciona su mes como financieramente dependiente di e pais mama, por mira esaki como auto-colonialismo, segun Van Haasen. E ruta pa igualdad real no ta caminda via di palabranan bunita y eufemismo politico, manera leynan di concenso, pero riba base di palabranan bon cla defini, supervision justo, y al final e posibilidat riba independencia completo pa tur pais den Reino, el a bisa.
Mas aleu Van Haasen a papia riba e deficit democratico den Reino. E ta bisa cu durante e reunion di Ipko cu a tuma luga di 26 pa 29 di september el a bolbe tende tocante e deficit democratico. Na su opinion esaki ta algu cu no por solucioná den practica pasobra Hulanda tin 18 miyon cuidadanonan mientrastanto riba tur e islanan den Caribe tin 336 mil hende ta biba.
Segun Van Haasen e conseho di Raad van State ta lansa speransa falso pasobra e ta duna e impresion cu e islanan por haya mas influencia, loke por causa desapunto, populismo y instabilidad. PVV, di acuerdo cu Van Haasen, ta kere cu por solucioná e deficit democratico hasiendo e paisnan den Caribe realmente independiente. Den cuadro di un grado mas halto di autosuficiencia, Van Haasen a bisa cu e ke sa con ta para cu subsidio pa proyectonan di agricultura y kico ta e criterio cu ta wordo usa pa esakinan.
Na su opinion mester implementa formanan moderno di agricultura riba un base hopi mas amplio na por ehempel Corsou. Parlamentario pa GroenLinks-PvdA, Raoul White, a pidi mas aclaracion riba ‘completamente independiente’ ku Van Haasen a referi pa e paisnan den Caribe. El a bisa cu e “waddeneilanden” hulandes tin comparable cu e islanan den Caribe y cu si nan tambe mester haya nan independencia completo. Van Haasen riba esaki a bisa enfatico cu e no ta referi na islanan BES den Caribe, pero Corsou, Aruba y St. Maarten. Mester yuda nan para riba nan propio pia y asina eliminá e deficit democratico.
Un dia despues di a huramenta na Aruba, minister Mildred Schwengle a yega Hulanda
DEN HAAG – Mildred (Milly) Schwengle a yega awe mainta Hulanda, despues cu ayera ela keda huramenta door di Gobernador di Aruba Alfonso Boekhoudt, como Minister Plenipotenciario di Aruba na Hulanda. Minister Schwengle a wordi ricibi na Schiphol door di hefe di e departamento huridico di Gabinete di Aruba mr. Shandra John.
Na Hulanda, autornan ta exigi cu Meta stop cu uso di nan trabou pa entrená AI
HILVERSUM - Sindicato di periodistanan NVJ, Auteursbond y sindicato di scibinan Lira na Hulanda ta exigi paMeta stop cu uso di texto scibi pa periodistanan y traductornan Hulandes pa entrena modelonan di inteligencia artificial (AI). Segun e sindicatonan, e compañia matriz di Facebook y Instagram ta usa trabounan cu tin derecho di autor pa entrena e modelo di lenga di Meta, Llama, sin paga e autornan pa esaki. Den un carta di somacion manda awe, e sindicatonan ta exigi cu e compañia di Mark Zuckerberg stop cu uso di e datasetnan ilegal. Tambe, segun nan, Meta mester stop cu ofrecemento di modelonan AI cu a wordo entrena cu e tipo di material aki. Si Meta no duna seguimiento na e carta, lo sigui un proceso legal, asina ta bisa presidente di Nederlandse Vereniging voor Journalisten, Thomas Bruning.
Na Hulanda, hackernan di Odido a publica parti di dato di clientenan atrobe
AMSTERDAM - E grupo criminal di hacker ShinyHunters a publica awe mainta tempran atrobe un parti di e miyones di dato di clientenan hackea di proveedor di telecomunicacion Odido riba e darkweb. Ta trata di mas o menos 1 miyon regla di dato. Aun no ta cla cuanto clientenan esaki ta toca. Na e prome publicacion di dato personal sensibel ayera, tabata tambe mas o menos 1 miyon regla di informacion di cientos di mil clientenan. Den total, segun Odido, dato personal di mas cu 6 miyones cliente a wordo roba. E criminalnan digital a bisa cu nan lo publica cada dia 1 miyon regla di dato, cu e meta di aumenta presion riba e compañia di telecomunicacion al maximo.
Odido no ta paga suma di rescate, criminalnan ta publica parti di datonan roba di cliente
AMSTERDAM - Compania di telecomunicacion hulandes Odido no lo paga placa di rescate na e hacker-nan cu e luna aki a horta miyones di dato di cliente cerca e compania. E grupo di hacker ShinyHunters p’esey a publica un parti di e informacionnan sensitivo di privacidad di clientenan riba e darkweb, un parti di internet dificil pa yega na dje.
Trouw: Aruba ta actua mas estricto contra aborto, hasta den caso di violacion
AMSTERDAM - E comite di experto cu ta evalua cumplimiento di Tratado di ONU pa Derecho di Hende Muher a expresa preocupacion serio riba posicion di hende muher na islanan caribeño Aruba, Corsou y Sint-Maarten. Asina e escritor di e portal hulandes Trouw, Jeroen Blijker ta scirbi awe den un relato na Hulanda. Segun e articulo, riba e islanan aki — paisnan autonomo den Reino Hulandes — aborto ta ilegal. Esaki incluso ta aplica den caso di violacion, peligro pa bida y salud di mama, of ora fetus no ta viable. Situacion ta diferente riba Bonaire, Sint-Eustatius y Saba, e otro islanan di ex-Antia Hulandes. Nan a armonisa nan legislacion ora nan a haya status di “municipio special” den 2010. Consecuentemente, aborto riba e islanan BES ta legal bou di cierto condicionnan, mescos cu den Hulanda.
Hulanda ta blokia gran parti di acceso na informacion riba e conflicto VS-Venezuela
DEN HAAG – Gobierno hulandes tin analisis interno amplio riba e tension entre Estados Unidos y Venezuela y e posible consecuencia pa Curaçao y Aruba, pero ta haci gran parti di esaki no accesibel pa publico. Esaki ta sali for di contesta riba un peticion Woo tocante posicion di Hulanda den e conflicto y situacion di seguridad den Caribe di Reino. For di decision riba e peticion ta resulta cu diez documento relevante a wordo haya, varia di analisis interno te documento diplomatico. Varios documento a wordo rechaza completamente y otro a wordo publica cu parti grandi tapa. Segun ministerio, publicacion por causa daño na relacion internacional y socava proceso diplomatico cu ainda ta andando.
Follow NoticiaCla
