- Huez-comisario a prolonga e detencion di pelotero yiu di Corsou Jonathan Schoop
- Avion di American Airlines a bati alarma diabierna na Aruba
- Durante reunion di e Hof a tuma desicion tocante propuesta pa President nobo di Hof
- SEPPA ta exigi pa Gobierno cumpli cu loke a wordo palabra cu Arubus
- Polis a detene dos menor di edad pa bringamento durante parada escolar
Besaril: A tir’e bou di bus mientras otro, acusa di mesun cos ta haya otro trato
ORANJESTAD – No obstante cu e lo haya su chens ora cu Corte trata e caso penal Tulipan integralmente proximamente, y a bisa tambe diaranson mainta di lo haci esaki na su debido momento, ex minister plenipotenciario Guilfred Besaril a comparti su pensamento den corte durante e asina yama ‘Regie-Zitting’. Segun Besaril, e base di su caso mester ta basa riba igualdad di trato, y e maneho presupuestario hiba durante su periodo como minister na Hulanda.
HOMBER DI LEY
E ex mandatario a recorda su periodo como polis, esta un homber di ley manera cu e mes a bisa, indicando cu e ta sigura di a actua semper corecto conforme ley, pa awor e bin haya su mes despues di 30 aña den servicio publico di cual 20 como polis, como acusado dilanti un mesa berde. E ta sigura cu ‘ta algo cu no ta facil pa asimila’. E ta sigura cu mientras e no ta acusa Ministerio Publico specificamente, e ta sigura si cu e caso no a cana como debe ser. Un ehempel ta e comienso di esaki. Simplemente e caso no a cuminsa bon. E la haci mencion di e persona clave den e caso, esta sr P. cu tabata representa Aruba na Bruselas e tempo ey pero cu pa motibonan practico, tabatin un espacio den Arubahuis. Ta resulta cu ta e mesun sr P. en cuestion a haña ta bon na ‘bati alarma’ riba supuesto iregularidadnan, siendo cu e no tabata e persona indica pa haci tal.
CASO BASA RIBA ASPECTO TECHNICO
“Mi no ta culpa OM, paso pa ora e caso a yega den nan man ya e storia tabata uno no corecto y bastante influencia” Besaril a sigui elabora. “Mi storia ta uno basa riba aspecto technico di presupuesto” e la sigui bisa. “Awe mi ta mi so para dilanti mesa berde, pero esnan cu a tuma decisionan y a aproba tanto e presupuesto como esunnan supletorio, no tey awe ‘kinan”. Cu esaki e ta referi na esnan encarga cu e maneho di presupuesto y otro personanan clave cu tabata envolvi den e proceso pa cual awe e ta wordo acusa inhustamente. Y pesey, a solicita un gran parti di testigo, cu mester por clarifica detayenan importante di caso.
NIVEL IGUAL
Ademas, segun Besaril, e la recorda tanto e huez como OM, cu na Hulanda e tabata minister, conforme e reglamento di ordo cu ta conta pa e Ministernan di Hulanda. E la recorda cu na cierto momento e Minister di ‘Rechtsbescherming’ di Hulanda a hañe den e mesun tipo di situacion den cual ta acusa Besaril awe na Aruba, y a wordo trata diferente. Na Hulanda e Minister por a sinta full su periodo sin problema alguno, y a yega na un acuerdo di pago via belasting cu su persona. Ora cu a kere cu esaki ta un “unicum” e mesun cos a sucede cu e alcalde di Amsterdam Halsema. Tambe a yega na un arreglo di pago vía belasting cu su persona y te cu e dia di awe e ta e alcalde di e capital di Hulanda, defacto e hefe di siguridad di ciudad pa esnan cu ta biba na Amsterdam. Den ambos caso ta trata di personanan cu lo a ‘abusa’ of no a maneha cu propiedad y placa di pais di forma correcto, pero cu a haya trato diferente. Nan a haya chens pa sinta, papia, paga bek y corregi e error. “Aki na Aruba, nos a co’i Besaril bent’e na KIA” e la bisa, refiriendo na e 24 dianan cu a cer’e na KIA na 2024 ora cu e caso a cuminsa.Pero contrario na dje, ni e Minister di Rechtsbescherming ni e alcalde di Amsterdam, nunca no a conoce un cel di paden. E si. Y como tal, ta haya cu ta tratando hende diferente, siendo cu nos ta den e mesun Reino Hulandes y mester trata hende conforme e asina yama ‘Gelijkheidsbeginsel’. Esaki tabata parti di e declaracion diaranson mainta, cu Besaril a comparti dilanti mesa berde.
DEFENSA
E la sigura cu ora cu e caso keda trata integralmente, e lo haya su chens y mustra cu tur loke cu e ta acusa di dje, no ta corecto y cu e la actua conforme sea regla of recomendacionnan cu e la ricibi y cu e no a haci nada malo of cu e intencion na enrikece su mes, pues di loke e ta wordo acusa di dje inhustamente. Y cu prueba y declaracion, e lo demonstra esey ora cu e caso bin dilanti proximamente.
Durante reunion di e Hof a tuma desicion tocante propuesta pa President nobo di Hof
WILLEMSTAD - Awe a tuma lugar un reunion di e Hof, unda entre otro tema a wordo trata e propuesta presenta pa e comision di seleccion pa President nobo di Hof, y riba esaki a tene un votacion. Riba base di e resultado di e votacion, e directiva lo recomenda por escrito, conforme cu lo ta stipula den e Ley di Reino, Sigmar Carmelia na e Ministernan di Husticia di e cuatro paisnan. E ministernan lo despues prepara un propuesta oficial pa nombramento pa e Conseho di Minister di Reino. E Conseho di Minister di Reino (incluyendo e gevolmachtigd ministernan di e tres paisnan) lo tuma un desicion final riba e propuesta pa Presidente di Hof. Despues di esaki lo wordo anuncia ken lo bira e Presidente nobo di Hof. Segun expectativa, e propuesta lo wordo trata den e Conseho di Minister di Reino prome cu zomer.
OM ta exigi 30 luna prison pa ex dirigente di Stichting Sportsubsidie Aruba
ORANJESTAD - Corte den Prome Instancia a trata awe e caso penal ‘Bromelia’ contra e sospechoso K.R.V. (30), ex-dirigente di Stichting Sportsubsidie Aruba (SSA). V. su mes no tabata presente den Corte, mirando cu e no ta na Aruba y no a bolbe mas tampoco pa e tratamento dilanti hues. E ta wordo acusa di estafa di SSA, malversacion di fondonan publico, labamento di placa y maluso di funcion.
Periodista Nelson ‘Speed’ Andrade mester ta bek den corte dialuna pa caso New York
ORANJESTAD - Dialuna 9 di februari 2026 lo tuma lugar regiezitting den apelacion di e caso penal ‘New York’ , unda cu periodista Nelson ‘Speed’ Andrade tin cu presenta. Un regiezitting ta un sesion den Corte di Prome Instancia of den Corte Comun di Husticia pa prepara pa trata contenido di un caso. Durante e regiezitting di dialuna awor ta bay mira con ta para cu e investigacion y particularmente si mester di investigacion adicional, manera si mester scucha mas testigo, prome cu e contenido di e caso mes wordo trata. Siguientemente Corte ta dicidi si e caso por wordo trata den su contenido y ta pone un fecha.
Conseho AG: Condena di ex-minister Sevinger den caso Avestruz por keda na vigor
DEN HAAG - E condena di ex-minister di Desaroyo Espacial, Infraestructura y Medio Ambiente (y despues di Desaroyo Espacial, Integracion y Infraestructura) di Aruba Benny Sevinger como co-autor di estafa contra e Pais Aruba, comision di soborno pasivo (laga soborna) y malversacion, por keda na vigor. Asina e conseho di abogado-general (AG) Paridaens na Hoge Raad den un di su conclusionnan a publica awe. Segun e AG, tambe e condenanan di dos co-acusado, entre otro pa soborna e minister, por keda na vigor. Loke cu esaki ta nifica, ta cu si Corte di Casacion tuma e conseho aki over, locual ta sosode 99% di biaha, cu sr Sevinger y e otronan cu a apela, tin cu raporta na KIA algun dia despues, pa cuminsa sinta nan respectivo sentencia.
Diaranson e prome trinta chauffeur gara bou influencia di alcohol, ta dilanti presenta dilanti huez
ORANJESTAD - Corte den Prome Instancia lo trata mañan e prome zitting pa casonan di alcohol di aña 2026. E zitting aki lo ta totalmente den cuadro di stuur bao influencia di alcohol. Trinta sospechoso a keda cita pa nan presenta dilanti Hues riba acusacion di a core burachi. Cu e zitting aki, Ministerio Publico kier pone enfasis cu core bao influencia di alcohol ta nifica peliger di morto. E consecuencianan di core burachi ta dal comunidad di Aruba duro y ta causa masha hopi sufrimento. E simannan nos tras esey a sali dolorosamente na cla. Tur hende por a wak e noticianan tocante e consecuencianan devastador di alcohol den trafico.
A prolonga detencion di chauffeur di accidente fatal cu a laga dos peaton morto
Follow NoticiaCla
