Banco Central di Aruba ta lansa encuesta tocante e status bancario y comportacion di pago

Banco Central di Aruba ta lansa encuesta tocante e status bancario y comportacion di pago

Posted on 02/4/2025 9:53 am AST | Updated on 02/4/2025 10:00 am AST

ORANJESTAD - Pa amplia su conocemento riba e aspecto di pagonan relata na inclusion financiero na Aruba, Banco Central di Aruba (BCA) lo tene un encuesta digital tocante e status bancario y comportacion di pago for di 4 di Februari 2025 te cu 25 di Februari 2025. 

E meta di e encuesta aki ta pa evalua e grado cu cuentanan bancario ta prevalece bao di residentenan na Aruba, explora e motibonan pa tin of no tin un cuenta bancario na un banco comercial local y compara e comportacion di pago di individuonan cu y sin cuenta bancario. 

E informacion obteni lo asisti BCA pa haya bista riba e grado di acceso na cuentanan bancario, identifica gruponan cu posiblemente ta exclui y haya mas informacion riba obstaculonan pa acceso na un banco. BCA lo analisa con individuonan cu y sin cuenta bancario ta maneha nan finansa, cu por revela tendencianan y preferencianan importante. Adicionalmente, e informacion aki lo yuda formula maneho pa reduci bareranan y mehora acceso na servicionan di pago.

E encuesta ta estrictamente anonimo y tur informacion obteni lo ta clasifica como confidencial y uza solamente pa metanan estadistico y pa maneho. 

BCA ta encurasha tur residente di Aruba cu tin 18 aña of mas, pa completa e encuesta aki. Pa por participa, bishita e website di BCA www.cbaruba.org, pagina di Instagram ‘Centrale Bank van Aruba’ y e pagina di Facebook ‘Aruba su Florin’. Tambe por scan e QR code of click riba e link di e encuesta https://www.surveymonkey.com/r/BankingStatusesPaymentBehaviors pa haya acceso directo na e encuesta. Si tin cualkier pregunta adicional, por fabor tuma contacto cu e Departamento di Sistemanan di Pago di BCA via email [email protected].

 

  • Powered by SETAR