- Barco ta dal Willemsbrug na Rotterdam, containernan ta bay awa
- Hospital di Corsou (CMC) ta bai ricibi Nafl. 252 miyon di gobierno den 4 aña
- ELMAR ta introduci CONTACTO CU BARIO
- Con Harris y Trump a hasi den e debate? 'Harris ta bin dilanti como presidencial'
- Kenna Hernandez ta presenta su buki debut ‘Los Diez Encantos’ na Hulanda
“ Nos no mester morde e man cu ta duna nos di come”
ORANJESTAD – Manera ta conoci, durante weekend cu a pasa, a sosode un incidente desagradabel na Baby Beach caminda a tuma luga un discusion entre turistanan y activistanan local tocante uso di palapa y beach. E activistanan, cu ta preocupa pa e presion di eventualmente locual “overtourism” por yega di significa pa nos isla, tawata expresa nan malcontento y dicidi di ataca diferente turistanan.
Minister di Turismo, sr. Dangui Oduber a informa diaranson mientrastanto cu e ta consciente di e situacion y kier dirigi su mensahe tanto na localnan, activistanan, pero sin lubida na e bishitantenan di nos dushi isla.
POPULARIDAD CRECIENTE DI ARUBA COMO DESTINACION
“Nos ta compronde cu e popularidad creciente di Aruba como un destinacion turistico ta trece retonan, particularmente na aspectonan di maneho di e balansa entre turismo y preservacion di nos cultura y medioambiente local,” Minister Dangui Oduber a bisa. “Sinembargo, ta importante pa recorda cu turismo ta e unico pilar di nos economia, cu ta duna pan pa miles di residente di nos isla. Nos no mester morde e man cu ta duna nos di come.”
MESTER DIALOGO CONSTRUCTIVO
Minister Oduber ta enfatisa cu ta necesario pa tin dialogonan constructivo y ta urgi pa activistanan y tur localnan cu ta preocupa pa expresa na maneranan apropia. “Nos di ministerio di turismo, hunto cu tur partner den turismo ta comprometi pa traha huntu pa haya un balansa cu ta respeta tanto nos localnan como e bishitantenan cu ta contribui significantemente na nos economia. Nos ta keda proteha nos localnan na promer lugar y hustamente pesey a tuma varios accion concreto caba. Nos no a laga esakinan na palabra of plan, sino decisionan a wordo tuma caba.”
Un ehempel di decisionnan tuma ta cu a introduci un maneho nobo di permiso di hotel pa asina limita, reduci y/of para expansionan di hotelnan pa e siguiente añanan nos dilanti.
LEY NOBO
Tambe a introduci un ley nobo pa regula vacation rentals na Aruba. Paso ya caba tin cifranan cu ta mustra cu 30% di tur bishitantenan cu ta yega Aruba ta kedando na un propiedad asina. Locual esaki ta causando ta cu viviendanan ta birando impagabel pa nos mes yiunan di tera. Tambe Minister Dangui Oduber a presenta un maneho di proyectonan di embeyecimiento yama “built with nature” pa asina respeta y conserva Aruba su naturaleza y crea e balansa necesario entre desaroyo y naturaleza.
CREA PRACTICA DI TURISMO SOSTENIBEL
Minister Oduber ta invita tur partido pa crea practicanan di turismo sostenibel cu ta beneficia tur hende.
Pa finaliza, Minister Dangui Oduber a lamenta masha cu e tipo di accionanan cu a tuma lugar cu ta “target” e turistanan. E issuenan aki mester por wordo adresa na un otro manera sin cu mester ataca, insulta y core cu turistanan for di Aruba. Nos ta un isla cordial y cada bishitante tin masha hopi opcion awendia pero ta scohe Aruba pa bin pasa nan vacacion.
AVP ta cambia tata pa yiu: Yiu muher di Benny Sevinger lo ta riba lista pa eleccion
ORANJESTAD – Partido berde AVP lo presenta un candidato cu fam Sevinger, pero no ta Benny. Esaki por a compronde di un declaracion cu e lider di partido Mike Eman a haci durante un entrevista cu e portal 24ora.com dialuna. Aki ta unda cu Eman a divulga pa prome biaha cu e la papia cu yiu muher di Benny, Stephany Sevinger, cu lo reemplaza su tata riba e lista di AVP. E yiu actualmente ta bibando na Hulanda pero lo bin Aruba pa e eleccion, por a compronde di Eman. Benny Sevinger su momentum a cambia full desde cu corte di apelacion a aumenta su castigo pa caso Avestruz barbaramente cu 4 aña, cu ta pone cu lo bira mas dificil pa e por haci algo awor, y convence su siguidornan cu e ta ‘inocente’. Posiblemente internamente y personalmente nan ta mir’e como inocente, pero e realidad ta cu e la keda condena awor pa di dos biaha, y cu un aumento di castigo. Algo dificil pa ‘praat goed’. Pues ta pensa cu esaki ta e motibo cu a opta pa Benny no subi lista, pero cu un miembro di famia cu e mesun fam y cerca di Benny, lo ta suficiente pa toch sigura e votonan di Benny, sin cu mester tin e tinte di ‘culpabilidad’ pa un sentencia den un caso penal.
Segun carta di MEP, RAIZ tambe a para fuerte pa un candidato ora MEP tabata ‘contra’
ORANJESTAD – No ta RAIZ so a pidi MEP pa cambia nan candidato postula pa un posicion manera cu a sosode awor. Esey ta resulta awor segun e carta cu premier Evelyn Wever Croes a manda pa lider di RAIZ dialuna, riba e tema di presidencia di Parlamento. Segun e carta, Wever-Croes ta recorda Arends cu den pasado MEP tambe a mustra nan desaprobacion pa un candidato cu RAIZ a postula, den e caso aki pa funcion di minister plenipotenciario, pero cu RAIZ a nenga di cambia. Ta trata di abogado Ronald Wix cu na final mes a retira su candidatura. Mientras cu e situacion tin algo di similaridad, e diferencia ta cu e candidato no a keda y no ta conoci kico MEP lo a haci si e candidato a keda.
Gobernador di Aruba a habri aña Parlamentario # 39 cu discurso adapta
ORANJESTAD – E apertura di e di 39 aña parlamentario tabata diferente e biaha aki, den e sentido cu pa cuminsa, e tin un presidente diferente cu e ultimo 3 añanan. Ademas cu e lo ta un termino cortico ya cu tin eleccion na December cu ta haci e termino di e aña 39 uno hopi cortico. Gobernador di Aruba S.E. Alfonso Boekhoudt a haci mencion di esaki den su discurso diamars mainta. Notable tambe ta cu debi na e situacion cu a surgi dialuna, mester a adapta e discurso cu normalmente ta cla algun dia prome caba. Mester a haci esaki pa ilustra e.o. cu esaki ta un aña parlamentario cortico, debi cu tin eleccion na December proximo, y cu despues lo por tin un otro constelacion di Parlamento. Como tal, a opta tambe den e discurso, pa tene esaki diferente, mas cortico. Y cu no tin sentido pa presenta un plan di maneho pa e aña siguiente, ya cu no esaki lo depende di e proximo gobierno cu sinta.
Otmar Oduber ta dicidi den weekend si e ta participa na proximo eleccion Parlamentario
ORANJESTAD – “Mi participacion na e proximo eleccion lo keda dicidi despues di consulta esnan mas serca dimi”, ex minister Otmar Oduber a bisa Noticiacla dialuna riba su situacion politico awor cu gobierno a cay. Esaki ta nifica cu tin eleccion mas prome cu planea, esta 6 di December proximo. Riba e pregunta ki tempo despues di e consulta e lo tuma y anuncia su decision si e ta participa na e proximo eleccion, e la bisa cu esaki ta tuma lugar despues di e fin di siman aki mes. Pues comienso di otro siman ta conoci si Oduber ta participa na e proximo eleccion.
Gobernador kier prome minister Wever-Croes sigui coopera te ora retiro di gabinete ta definitivo
ORANJESTAD – Gobernador di Aruba S.E. Alfonso Boekhoudt a informa dialuna atardi cu e la informa premier Evelyn Wever-Croes cu e ta ‘considerando e peticion di retiro pa e ministernan di gabinete Wever-Croes y e minister Plenipotenciario di Aruba. Esaki sinembargo ta un simple ‘formalidad’ ya cu ta normal cu ta acepta e retiro. Tambe Gobernador a haci un peticion na Prome Minister y su gabinete pa sigui percura pa loke ta wordo considera necesario na bienestar di pais Aruba y pa sigui coopera cune te ora cu un decision a cay riba e peticion di ontslag.
Arends: Ningun momento RAIZ a kibra programa di gobernacion
ORANJESTAD – Ningun momento RAIZ a kibra e programa di gobernacion segun lider di e partido Ursell Arends. Asina e la declara na salida di su audiencia cu Gobernador di Aruba dialuna atardi. Segun Arends, tur momento tabata cla pa vota pa un persona di MEP haya e presidencia, manera cu e programa di gobernacion ta stipula. Pero no pa e persona. Ademas, segun Arends, ningun momento a haya e nomber manera solicita sino te dialuna mainta. A bisa tambe cu si no haya un otro nomber, lo sostene nan colega Kamperveen pa e funcion.
Follow NoticiaCla
