- Corte: Ta trata apelacionan di caso Avestruz entrante 13 di mei di proximo
- VIDEO: Antersijn ta conta di highlight di su carera profesional como keeper
- Arends: Aruba comprometi pa alcansa Cero Emision di Carbon pa 2050
- Mural na airopuerto di Corsou honrando Margareth Abraham
- Luna di Locura cu Lotto 5! Cu cada compra di 2 Lotto 5 riba e mesun ticket, ricibi 1 Lotto 5 loco completamente gratis!
Gobierno Hulandes a anuncia pasonan conkreto despues di disculpa pasado di sclabitud
DEN HAAG - Un areglo di supsidio pa inisiativa sosial ku ta fásilmente aksesibel. Kambio di nòmber grátis pa desendiente di katibu bibá na Hulanda Oropeo i Hulanda Karibense. Mas atenshon na prevenshon di diskriminashon i rasismo. Invershon den herensia kultural. I amplia konosementu di e manera ku pasado di sklabitut tin afekto te ku awor. Esaki ta algun di e pasonan konkreto ku gabinete hulandes a tuma despues di e diskulpa di Gobièrnu pa e pasado di sklabitut. E manera ku ta yena e asina yamá ‘espasio tras di e kòma’ ta un proseso kouteloso ku embolbimentu aktivo di desendientenan. Esaki ta pará den e karta di progreso tokante e programa di pasado di sklabitut ku gabinete hulandes a manda awe pa e parlamento.
AREGLO DI SUPSIDIO BASÁ RIBA DIÁLOGO
Pa enbolbí e desendiente i otro persona konserní den tur fase di e proseso, durante e último seis luna, a tene entre otro diferente reunion na Sint Maarten i Den Haag.
Durante seshonnan di diálogo na Hulanda Oropeo, a papia ku 270 desendiente den e pais kompletu i ònlain, tokante di konmemorashon di e pasado di sklabitut i tokante nan idea pa inisiativa sosial. E resultadonan di e seshonnan di diálogo ta pará den un rapòrt final.
Resultado di e seshonnan di diálogo tambe ta forma parti di e areglo di supsidio den konsepto pa inisiativa sosial pa Hulanda Oropeo. E supsidio mester ta fásilmente aksesibel pa organisashon di ‘grassroot’, pa asina nan no tin muchu difikultat pa apliká.
Den e investigashon a sali na kla ku e hendenan ta haña importante ku si ta invertí den inisiativa sosial, esaki mester ofresé solushon pa kombatí desigualdat struktural. Gabinete hulandes a pone 100 mion euro disponibel pa e supsidio aki. E montante ta dividí den tres parti: €33,3 mion pa Hulanda Oropeo, €33,3 mion pa e parti karibense di Reino, i €33,3 mion pa Sürnam.
A konkluí e konsulta di e areglo di supsidio aki pa tantu e parti hulandes i karibense di Reino. Den hèrfst ku ta bini por entregá e promé petishonnan.
Kambio di nòmber, investigashon efekto di e pasado di sklabitut i lucha kontra diskriminashon
Ademas, e gabinete ta pone € 100 mion disponibel pa otro medidanan dirigí riba konsientisashon i rekonosementu, konosementu i efekto i e prosesamentu di esaki. Geográfikamente ta repartí e fondonan aki tambe igualmente entre e tres regionnan.
Ta reservá € 14,9 mion pa un areglo ku ta permití desendiente pa kambia su fam grátis entrante promé di yüli 2024. E meta ta pa entrante promé di yanüari 2025 esaki tambe ta posibel pa desendiente ku ta biba na Boneiru, Saba i Sint Eustatius. Riba 19 di desèmber 2022 e gabinete a deklará ku e ta bai hasi mas esfuerso pa kombatí diskriminashon i rasismo. Asina ta pone 1.7 mion euro disponibel pa komunikashon públiko amplio pa kombatí diskriminashon i rasismo.
Tambe ta amplia posibilidat pa haña i mira servisionan di anti-diskriminashon. A base di dato, konosementu i investigashon disponibel, ta trata di haña un mihó komprondementu di e manera ku e pasado di sklabitut ta kondusí na diskriminashon i rasismo den e sosiedat di awendia. Pa e investigashon aki gabinete ta pone €3,8 mion disponibel. Ademas, via di e 'Leernetwerk Slavernijverleden ' ta yuda munisipio pa duna kontenido na e efektonan di e pasado di sklabitut den su propio konteksto lokal. Esaki ta enserá €1,1 mion.
Ademas, lo tin un programa di investigashon di vários aña riba e manera ku e pasado di sklabitut tin efekto te ku awendia (€1,7 mion).
E museo nashonal di sklabitut lo risibí €3 mion pa un sentro di konosementu pa fortifiká su funshon di konosementu i nètwèrk na nivel di Reino i internashonal i pa hasi akseso digital na e museo posibel.
Ademas di esaki, €4,5 mion ta disponibel pa invertí den konservashon i desaroyo di museo, archivo i protekshon di patrimonio kultural.
E pasado di sklabitut tambe tin efekto riba e salú (mental) i bienestar di e desendientenan. Esaki a sali na kla despues di diferente kombersashon ku e desendientenan. E gabinete ta pone €1,7 mion disponibel pa intervenshon ku mester prevení efekto negativo riba salú. Alumno den enseñansa primario i sekundario na e momentunan aki ya ta siña tokante di e pasado di sklabitut i tambe den e kuríkulo nobo esaki lo haña su lugá.
Ademas, e gabinete ta inisiá akshonnan ku ta duna mas atenshon na e pasado di sklabitut den enseñansa primario i sekundario (€0,8 mion). Pa e partinan karibense di Reino, e islanan ta traha riba e asina yamá 'herstelagenda'. Esaki ta basá riba prioridatnan pa kada pais/isla i e kompromiso ku ya a hasi. Ehèmpel di e kompromisonan aki ta rehabilitashon di Tula, akseso digital na archivo i aktualisashon di métodonan di enseñansa. Sürnam ta plania di krea un plataforma den kua algun representante di e gruponan mas interesá lo partisipá pa tene un diálogo tokante di e montantenan ku tin disponibel.
AÑA DI KONMEMORASHON I KOMITÉ DI KONMEMORASHON
Den e Aña di Konmemorashon (1 di yüli 2023 te ku 1 di yüli 2024) ya a sostené 200 proyekto den Hulanda Oropeo i e parti karibense di Reino. Ta trata di proyekto di arte visual, patrimonio, arte teatral i literatura, pero tambe ‘podcast’, diálogo, seshon di ‘safe space’, tayer, konmemorashon i selebrashon.
Te ainda a sobra €1.6 mion pa proyekto for di e Fondo di Partisipashon Kultural. Organisashonnan ainda por hasi petishon pa esaki. E fondo a nombra eksploradó den e parti karibense di Reino pa yuda ku entrega di petishon pa proyekto.
E aña di konmemorashon di sklabitut ta terminá dia 1 di yüli 2024, pero e konmemorashon i atenshon pa e pasado di sklabitut ta keda. Durante e periodo ku ta bini, e gabinete ta sigui dialogá ku NiNsee i otro organisashonnan ku ta okupá ku konmemorashon den Reino i Sürnam pa yega na un Komité di Konmemorashon di e pasado sklabitut. Pa esaki e gabinete a reservá €8 mion pa aña. E meta ta pa promé ku 1 di yüli 2024 por duna un enkargo na e komité i e presidente di e komité. E komité lo kuminsá no mas lat ku e temporada di hèrfst di e aña aki. NOTA: Texto ta scirbi den Papiamento fonetico di Corsou.
Hulanda ta #4 riba lista di paisnan cu mas ta goza di libertad di prensa na mundo
AMSTERDAM – Hulanda ta number 4 riba lista di paisnan cu ta goza di mas libertad di prensa mundialmente. Esaki ta conforme un rapport di Periodistanan Sin Frontera (RSF). Esaki ta un ascenso cu dos posicion di 6. Mester bisa cu na 2021, Hulanda a baha te posicion 28, cu e morto di periodista di crimen Peter R. de Vries. Aruba, Bonaire y Corsou no ta aparece riba e lista aki. Awe mundo ta recorda Dia internacional di libertad di prensa. Paisnan manera Merca ta hopi mas atras, y Venezuela p.e. ta un di e paisnan casi na final. Click AKI pa e lista completo di 180 pais cu ta figura riba e lista aki.
Morto violento di Arubiano Ponson na Hulanda tin varios pregunta ainda
AMSTERDAM – E morto violento di e Arubiano Johnny Ponson (65) na Amsterdam e siman aki ta yen di pregunta ainda. Asina ministerio publico ta raporta. E homber a wordo haya diasabra ultimo morto den su camber den e flat Gravenstein den Bijlmer. “Nos tin hopi pregunta ainda riba e victima y su bida” Folkert van Dekken, cu ta lidera e ekipo di recherche investigando e crimen. “E no tabata sali hopi, pero tabata hopi servicial cu su bisiñanan. E tabata yuda nan cu nan papel di impuesto. E tabata pensiona pero ta yuda hende si. E tabata biba su so, pero tin 3 yiu cu dos muher. Riba e diasabra mainta di e suseso, un conoci di Ponson a sinti algo straño. “E victima a bestel cuminda den siman, pa busca den fin di siman. Pero e no a bin. Un otro amigo tabatin un cita cu ne e diasabra ey. E la bishite diadomingo pero ningun hende a contesta, cu ta straño pasobra semper e tabata na cas. E la alarma polis e ora cu a haya e curpa. Mientras cu Ponson tabatin algun dia morto, no ta conoci ainda cuanto dia.
Air France-KLM ta registra perdida di mas grandi desde crisis di Covid
SCHIPHOL – E aeroliña Air France-KLM a registra su prome perdida di mas grandi desde e crisis di Covid, durante e ultimo cuartal. E aeroliña tin problema cu e tension geopolitico rond mundo, unda cu avionan tin cu bula pa evita cierto paisnan, haciendo e buelo mas largo y mas caro, y tambe cu piesanan di avion ta yega laat. Ademas, e perdida ta tambe ta debi na aumento di gastonan salarial mientras cu e entrada di transporte di carga a laga di desea.
OM: Na Hulanda, homber cu ta liber atrobe, a bolbe tira, djey bay Aruba sin permiso
ROTTERDAM – E homber Kevin R (28) lo a tira atrobe, apenas despues di a recobra su libertad di un caso di asesinato. Segun Ministerio Publico, e la haya un chens, despues di cu e la tira un homber mata. Pero despues e la biaha pa Aruba, contra tur regla. Pero prome cu e la biaha, e tabata envolvi den un episodio di tiramento, cu por a resulta fatal atrobe. Segun R., e la biaha pa Aruba pa entiero di su welo. Pero segun Ministerio Publico tin algo otro su tras.
Presentadornan conoci Hulandes Sophie Hilbrand y Jeroen Pauw ta cuminsa talkshow riba NPO1
HILVERSUM – E presentadornan di television Hulandes Sophie Hilbrand y Jeroen Pauw ta presenta entrante 2 di September proximo un talkshow nobo anochi laat riba e cadena NPO1. PA 8 luna pa aña nan lo presenta e programa 4 biaha pa siman, cu ta reemplasa Ol1. E nomber mes di e programa, lo keda anuncia despues. Pauw a bisa riba su pagina di Facebook cu e ta contento di ta presenta e programa hunto cu Hilbrand. Quizás "talento prometedor" no ta necesariamente un cualificacion pakmi, pero mi ta hopi entusiasma di participa den e programa cu e dama aki” refiriendo na e dama riba e potret di publicidad, di nan dos. . Pauw a reemplasa Khalid Kasem di e programa Khalid & Sophie, despues cu na januari tabatin discusion riba Kasem. E tabata relaciona cu soborno, pero no a wordo haya culpable. Pauw a laga sa anteriormente cu e no kier a presenta programa 5 biaha pa siman mas. Esey ta bira dos anochi awor ora cu e presenta e programa. Potret cortesia N.O.S.
Rutte a logra convence Turkia pa sostene pa e bira hefe di NATO
ANKARA – Turkia a duna su sosten oficialmente pa prome minister Hulandes demisionario Mark Rutte bira e hefe grandi diu NATO. Asina prensa Turko dialuna. E oficina nacional di estado di prensa Anadolu, a confirma e informacion di e sosten. Rutte tabata di bishita personal siman pasa na Turkia, pa papia cu e presidente, buscando e sosten. Turkia su sosten ta un di e ultimonan cu e mester pa sigura e nombracion. Ainda falta 3 pais di NATO pa duna e sosten. Falta Hungria, Slovakia, y Rumenia pa confirma. Pa por bira e secretario general, e mester di un sosten unanime di tur 32 miembro di NATO.
Follow NoticiaCla
