PG na Corsou ta pidi casacion pa destrui veredicto tocante integridad candidato minister

PG na Corsou ta pidi casacion pa destrui veredicto tocante integridad candidato minister

Posted on 04/2/2024 10:02 am AST | Updated on 04/2/2024 10:33 am AST

WILLEMSTAD  – Djaweps siman pasá Prokurador General (PG) di Korte Supremo (Kasashon) a entregá un demanda (petishon), na  interes di e lei riba e terminologia ‘kondená pa un delito o krímen’ ku ta referí na e Ordenansa di Integridat (Kandidato) Ministernan di Kòrsou. Esaki tabata motibu ku Kasashon a saka un komunikado di prensa relashoná ku e demanda hasí.

E pregunta ku mester keda kontestá ta si un akusado keda hañá kulpabel pa un delito penal sin ehekushon di un kastigu  òf medida (e asina yamá pordon hudisial) ta un kondena òf no.

Segun e Tribunal di Korte di Hustisia di Aruba, Kòrsou, St. Maarten, Boneiru, St. Eustatius i Saba (Tribunal) a konkluí ku keda hañá kulpabel sin ehekushon di kastigu no ta igual na un kondena. Esaki ta loke ku a keda disidí den un kaso sivil ku dr. Braam a entamá kontra di Gobièrnu komo e tabata kandidato pa Minister. Motibu di su kaso entamá tabata pa e haña un deklarashon di derecho pa e por keda eligí pa un puesto ministerial. Braam a retirá su kandidatura despues ku a keda revelá ku el a keda kondená pa un delito den pasado sin ku a imponé ningun sanashon òf medida. Sinembargo, e desishon di e Tribunal aki na Kòrsou no ta korekto, esaki ta loke ku Prokurador General ta di opinion. Esaki ta motibu ku Prokurador General a entregá su demanda na Korte di Kasashon na interes di e lei.

Pa kontestá e pregunta ariba menshoná Prokurador General a bai den un pida historia.

T’asina ku e Ordenansa Nashonal di País di Kòrsou, ta kontené normanan tokante integridat di ministernan (kandidato) tokante integridat di ministernan (kandidato) “Landsverordening integriteit (kandidaat) Minister (Lvim). Den e ordenansa aki ta stipulá ku un persona ku a ser ‘kondená pa un delito’ no por keda nominá pa un puesto di minister i su nominashon tampoko no por keda promové.

Den e kaso aki, Korte Sivil dia 4 di yüli 2023, a disidí ku deklarashon di kulpabel no ta igual na un kondena pa delito’ manera menshoná den artíkulo 7, párafo 1 (A) Lvim, ya ku no a imponé ningun kastigu òf medida. Ta trata di un kondena imponé na aña 2002.

Den e kaso spesífiko aki, Gobièrnu di Kòrsou no a apelá e desishon aki na kasashon. Esaki tabata motibu ku Prokurador General na Kasashon a presentá un demanda na Korte Supremo na interes di lei. Esaki den bista di unidat legal i desaroyo legal, ta bon pa Korte Supremo disidí riba e asuntu aki.

Na opinion di Prokurador General, pa yega na un  punto di salida pa e definishon kiko ta nifiká pordon  hudisial, Prokurador general ta yega na e punto di bista ku pordon hudisial ta igual o sea mester keda konsiderá komo un kondena.

Ademas, Prokurador General ta referí na hurisprudensia di Korte Supremo Penal. Banda di esaki Prokurador General ta haña sosten den e hurisprudensia di e kaso menshoná ku pordon hudisial mester keda konsiderá un kondena.

Pronto Korte di Kasashon lo duna su desishon, sinembargo no ta konosí ki dia Korte Supremo lo duna su desishon. NOTA: Texto ta scirbi den Papiamento fonetico di Corsou. 

  • Powered by SETAR