DEN HAAG – E instituto Real Meteorologico di Hulanda KNMI ta spera un temporada di horcan hopi activo pa 2024. Asina e instituto ta bisa den su raportahe awe riba su porta. E temperaturanan den laman ta hopi cayente cu ta net loke e sistemanan tropical mester pa fomenta e ciclonan den Atlantico y Caribe. “E temperature cayente por tin hopi influencia riba e temporada di horcan di 2024” KNMI ta bisa. “Nos ta spera un temporada di horcan hopi activo mes”.
TEMPERATURA HALTO
Si e temperature mantene su mes asina halto, e lo ta preocupante pa e temporada. Cu desaparicion di El Niño, tin poco factor pa para den caminda di un temporada activo. Tin un chens di 62% cu e situacion ta bolter pa La Niña, cu ta fortifica juist e chens pa condicionan di horcan. E temporada record na 2017 cu horcanan catastrofal manera Harvey, Irma y Maria tabata tambe durante La Niña.
PRONOSTICO
E pronostico ta yama pa 20 tormenta tropical, hopi, di cual 9 ta bira horcan y di cual 4 di categoria pisa. Pues mas activo cu na 2023. Pero asina mes, e ta hopi insigur kico ta kico. Ta e speransa pa e temperatura di laman no keda asina extremadamente halto, y cu La Niña keda afo mas largo. Y tambe tin e chens cu den un temporada activo di horcan, e horcan mes ta keda leu di tera. Dia 15 di mei, 15 dia prome cu e temporada cuminsa (1 juni -30 november), lo tin e proximo pronostico di NOAA, e instituto climatologico federal Mericano. Mayoria di e tormentanan ta sosode den augustus, September y October, ora cu e temperature ta mas halto cu 26.5 grado celcius.
EMMEN – Diasabra mainta 11’or e famia Real a yega e pueblo di Emmen den e provincia Drenthe, unda cu nan a pasa Dia di Rey e biaha aki. Rey Willem-Alexander, casa Reina Maxima y su tres yiunan, entre nan prinses Amalia, tabata parti di e bishita. Pero e Rey a trece su famia casi completo, excepto su mama prinses Beatrix. Pa algo mas di 2 ora, e famia a disfruta di un programa cu a consisti grandemente di un caminata door di 9 plenchi, pa asina mira e parti bieuw y nobo di Emmen y Drenthe. Un evento cu a costa algo mas di 2.5 miyon euro.
HILVERSUM – E conocido presentadora di television Hulandes, conoci mas pa e presentacion di e noticianan di Sinterklaas, Dieuwertje Blok (66) ta retira di su funcion. Esaki pasobra e mester haci un operacion cu ta cambia su apariencia. E mester laga amputa su nanishi pa evita cu cancer detecta, ta plama mas leu den su curpa. Asina e la informa den un entrevista na e corant Volkskrant. Cu e entrevista, e ta purba prepara hende pa e ‘spanto grandi’ manera e mes ta yama e situacion.
DEN HAAG – Tin chens cu gobierno di Hulanda por stop su actividad riba e red social Facebook. Esaki pasobra e compania madre di e compania, esta META, no ta dispuesto pa adapta cierto risico pa loke ta informacion personal di persona. Asina secretario di estado Hulandes Alexandra van Huffelen cu tin e cartera di digitalisacion tambe. Un conseho di ‘Autoriteit Persoonsgegevens’ a confirma den un conseho na e ministerio di Binnenlandse Zaken en Koninkrijkrelaties (BZK) di e risiconan en cuestion y a conseha pa no continua cu nan actividad riba Facebook.
EINDHOVEN – E seleccion di futbol Hulandes PSV tin posibilidad pa titula campeon di Hulanda awe nochi. Awe nochi (ora di Hulanda) tin e partido entre PSV y Sc Heerenveen. Si nan gana, y Feyenoord no logra haya punto contra Go Ahead Eagles, e seleccion di Peter Bosz no por wordo alcansa mas. Hasta si PSV empata contra Heerenveen y Feyenoord perde di Go Ahead, e titulo ta di e ekipo di Eindhoven. Pa PSV, esaki lo ta e prome titulo nacional desde 2018.
DEN HAAG – Arubahuis a tene un Ban Topa diaranzon anochi 24 di April cu studiantenan for di e region di Leiden, Den Haag, Delft y Rotterdam. Esaki a tuma lugar na De Haagse Hogeschool y a conta cu presencia di Minister Plenipotenciario mr. Ady Thijsen, Minister di Finanza y Cultura Xiomara Maduro, Minister di Labor, Integracion y Energia Glenbert Croes y directora di Gabinete di Aruba mr. Joselin Croes. Tambe tabata presente directora di Departamento di Recurso Humano (DRH) Omaira Lares.
DEN HAAG – E partidonan politico cu ta formando gobierno nobo na Hulanda ta deliberando pa haci cambionan drastico den cuido medico, particularmente e suma cu e ciudadano tin cu paga su mes, conoci como ‘eigen risico’, pa e haya e cuido. Nan ta sinti cu e suma actual, 358 euro, ta mucho halto. Y ta pensando pa sea baha esaki na mitar of elimina esaki completamente. E ta un deseo ferviente di e partidonan PVV y BBB. Nan ta kere cu e suma halto di eigen risico ta pone cu hopi ta evita pa haya ayudo medico. E otro dos partidonan VVD y NSC ta mas cauteloso, pasobra si elimina e suma, ta kita e concientisacion cu cuido no ta gratis. E intencion ta pa elimina abuso den cuido medico y ta pone hende pensa dos biaha prome nan bay pa e cuido cu porta ta innecesario. Si elimina e suma, e ta costa e pais 3.6 biyon euro pa aña.