- Segun Camara di Comercio, mas di 3.600 Venezolano a participa den negoshi na Aruba
- Agente di biahe Mericano a estafa grupo di turista cu a paga pa bin Aruba pa dia di mama
- Conforme Tripadvisor, Aruba tin 3 hotel den top 25 di hotel den Caribe
- Rey Willem-Alexander y famia a celebra su cumpleaños na Emmen
- Presion di CAFt a pone gobierno kita 16 miyon pa RWZI di e prespuesto
Wever: Grupo Hulandes kier bin cu ‘Ferris Wheel’ den Oranjestad
SCHEVENINGEN – Siman pasa diabierna Minister Geoffrey Wever a haci un bishita na The Pier Skyview na Scheveningen, Hulanda, unda e mandatario a reuni cu interesadonan priva cu a expresa nan entusiasmo pa introduci un atraccion similar na Aruba, specificamente den e ciudad di Oranjestad.
E bishita aki ta forma parti di e esfuersonan continuo pa revitalisa e centronan di ciudad di Oranjestad y San Nicolas, un iniciativa cu ta busca pa aumenta e trafico di persona y, por consecuencia, e factibilidad comercial di e areanan. Un di e strategianan clave ta pa introduci atraccionnan unico cu por atrae tanto turista como residente local.
Interesadonan priva a sugeri cu e introduccion di un "Ferris Wheel" – similar na esnan famoso den ciudanan manera Orlando, London, y Paris – por sirbi como un manera pa diversifica y enrikece e ofertanan di atraccion turistico na Aruba. E plan pa situa e atraccion aki den Oranjestad ta contribui na e esfuerso pa revitalisa e capital y ofrece un alternativa atractivo na e zonanan mas satura manera Palm Beach.
Minister Wever a expresa cu e inversionistanan priva ya ta cla pa inicia cu e proyecto, pero ta reconoce cu lo tin varios permisonan gubernamental necesario prome cu e ehecucion. E proceso pa obtene e permisonan aki ta esencial pa segura cu e proyecto ta den linea cu e regulacionnan y normanan di seguridad estableci. Minister Wever a segura cu e lo sigui e desaroyonan di cerca pa mira cu tur cos ta cana manera debe ser.
Minister Wever a enfatisa su apoyo pa inversionnan cu ta alinia cu e vision pa revitalisa e centronan di ciudad di Oranjestad y San Nicolas.
Rey Willem-Alexander y famia a celebra su cumpleaños na Emmen
EMMEN – Diasabra mainta 11’or e famia Real a yega e pueblo di Emmen den e provincia Drenthe, unda cu nan a pasa Dia di Rey e biaha aki. Rey Willem-Alexander, casa Reina Maxima y su tres yiunan, entre nan prinses Amalia, tabata parti di e bishita. Pero e Rey a trece su famia casi completo, excepto su mama prinses Beatrix. Pa algo mas di 2 ora, e famia a disfruta di un programa cu a consisti grandemente di un caminata door di 9 plenchi, pa asina mira e parti bieuw y nobo di Emmen y Drenthe. Un evento cu a costa algo mas di 2.5 miyon euro.
Conocido presentadora di programa Sinterklaas Journaal mester laga amputa su nanishi
HILVERSUM – E conocido presentadora di television Hulandes, conoci mas pa e presentacion di e noticianan di Sinterklaas, Dieuwertje Blok (66) ta retira di su funcion. Esaki pasobra e mester haci un operacion cu ta cambia su apariencia. E mester laga amputa su nanishi pa evita cu cancer detecta, ta plama mas leu den su curpa. Asina e la informa den un entrevista na e corant Volkskrant. Cu e entrevista, e ta purba prepara hende pa e ‘spanto grandi’ manera e mes ta yama e situacion.
Gobierno Hulandes ta evaluando pa stop su paginanan riba Facebook
DEN HAAG – Tin chens cu gobierno di Hulanda por stop su actividad riba e red social Facebook. Esaki pasobra e compania madre di e compania, esta META, no ta dispuesto pa adapta cierto risico pa loke ta informacion personal di persona. Asina secretario di estado Hulandes Alexandra van Huffelen cu tin e cartera di digitalisacion tambe. Un conseho di ‘Autoriteit Persoonsgegevens’ a confirma den un conseho na e ministerio di Binnenlandse Zaken en Koninkrijkrelaties (BZK) di e risiconan en cuestion y a conseha pa no continua cu nan actividad riba Facebook.
Seleccion di futbol Hulandes PSV tin posibilidad pa titula campeon di Hulanda awe nochi
EINDHOVEN – E seleccion di futbol Hulandes PSV tin posibilidad pa titula campeon di Hulanda awe nochi. Awe nochi (ora di Hulanda) tin e partido entre PSV y Sc Heerenveen. Si nan gana, y Feyenoord no logra haya punto contra Go Ahead Eagles, e seleccion di Peter Bosz no por wordo alcansa mas. Hasta si PSV empata contra Heerenveen y Feyenoord perde di Go Ahead, e titulo ta di e ekipo di Eindhoven. Pa PSV, esaki lo ta e prome titulo nacional desde 2018.
Arubahuis a tene un ‘Ban Topa’ cu studiantenan na Den Haag
DEN HAAG – Arubahuis a tene un Ban Topa diaranzon anochi 24 di April cu studiantenan for di e region di Leiden, Den Haag, Delft y Rotterdam. Esaki a tuma lugar na De Haagse Hogeschool y a conta cu presencia di Minister Plenipotenciario mr. Ady Thijsen, Minister di Finanza y Cultura Xiomara Maduro, Minister di Labor, Integracion y Energia Glenbert Croes y directora di Gabinete di Aruba mr. Joselin Croes. Tambe tabata presente directora di Departamento di Recurso Humano (DRH) Omaira Lares.
Na Hulanda, partidonan formando formando gobierno, kier corta ‘eigen risico’ den cuido medico
DEN HAAG – E partidonan politico cu ta formando gobierno nobo na Hulanda ta deliberando pa haci cambionan drastico den cuido medico, particularmente e suma cu e ciudadano tin cu paga su mes, conoci como ‘eigen risico’, pa e haya e cuido. Nan ta sinti cu e suma actual, 358 euro, ta mucho halto. Y ta pensando pa sea baha esaki na mitar of elimina esaki completamente. E ta un deseo ferviente di e partidonan PVV y BBB. Nan ta kere cu e suma halto di eigen risico ta pone cu hopi ta evita pa haya ayudo medico. E otro dos partidonan VVD y NSC ta mas cauteloso, pasobra si elimina e suma, ta kita e concientisacion cu cuido no ta gratis. E intencion ta pa elimina abuso den cuido medico y ta pone hende pensa dos biaha prome nan bay pa e cuido cu porta ta innecesario. Si elimina e suma, e ta costa e pais 3.6 biyon euro pa aña.
Follow NoticiaCla
