Si no tin acuerdo entre ABA y DUCAPRO riba tarifa, e lo por afecta e panorama radial di Aruba

Si no tin acuerdo entre ABA y DUCAPRO riba tarifa, e lo por afecta e panorama radial di Aruba

Posted on 02/28/2024 4:22 pm AST | Updated on 02/28/2024 4:22 pm AST

ORANJESTAD – Si aki dos luna, e asosacion di doñonan di radio emisora na Aruba esta Aruba Broadcasting Association (ABA) no logra yega na un acuerdo pa un tarifa husto pa paga e fundacion DUCAPRO pa por toca musica di un grupo di artista, esaki lo tin un impacto riba e panorama radial na Aruba. Esey por a deduci di e conferencia di prensa diaranson mainta unda cu e presidente di e asosacion, Aldrich Croes diaranson a splica e situacion di su radio y di otro radionan na Aruba. Hunto cu abogado di QWAVE NV Gabriela Sjiem Fat (cu a representa e emisora siman pasa  den corte) a resumi e resultado di e caso y despues a duna un bista chikito di kico por spera. Sea huez aki dos luna por bay di acuerdo cu e demanda di DUCAPRO, cu ta nifica cu e radionan tin cu bay paga un suma specifico pa por toca musica, y consecuentemente tin cu bay  ahusta nan operacion seriamente, of ta logra un suma husto cu tur radio por biba cu ne. 

HOPI RADIO

Segun Croes, di e 22 radioemisoranan cu ta transmiti na Aruba, 21 ta miembro of ta representa pa ABA. Y tur kier paga pa e derecho di por tuma musica, pasobra tur kier ta actuando ‘legal’ ora cu ta toca musica di otro. Pero mes momento a duna un bista di e situacion financiero cu e radionan ta bibando aden actualmente. Segun Croes, e radionan ta traha cu 6 luna bon y 6 luna malo. Tin 6 luna di aña cu e radionan ta strica placa, manera temporada di fin di aña, carnaval y otro periodo. Pero e resto di aña e otro 6 lunanan, cos ta nada bon pa e radionan, pues nan mester maneha e situacion responsablemente. Di otro banda, e cobransanan pa DUCAPRO, ta a base di un acuerdo di 12 luna pa aña. Pues no obstante e situacion di e radio, e tin cu bay paga placa tur luna pa e permiso pa por toca musica. 

BAHA GASTO

E situacion por surgi cu partidonan no ta haya otro, y esey kier men cu aki dos luna, den caso specifico di e radio cu a haya e prome caso contra dje, QWAVE NV, doño di Hits100 FM, por haye ta stop di toca musica, of ta haya un suma ordena pa paga, pa cual e mester bay ahusta su operacion radial. Mester pensa den por ehempel, reduci e operacion radial, menos hende menos ora, tur tipo di medida cu ta traduci den menos gasto operacional. Y of cu huez ta prohibi e emisora di toca musica, te ora cu yega na un sentencia den corte.  

IMPACTO RIBA E MUSICA 

No sa ainda con e medida lo impacta e parti musical y si ta nada mes nan por toca mas, pasobra no tin un bista ainda exacto di ken tur DUCAPRO ta representa. Si ta musica for di Europa so, of tambe Merca, of un combinacion di esaki. Croes a specifica cu gran parti di e musica di nan repertorio di e radio HITS 100FM ta Mericano, y un parti chikito ta Europeo y Latino. Pues si ta esun Europeo so, e efecto lo no ta grandi. Pero e problema ta cu no sa cuanto artista DUCAPRO ta representa y ki efecto e asosacion cu BUMA/STEMRA ta, ya cu DUCAPRO ta representa nan. 

  • Powered by SETAR