Banco Central di Aruba ta mantene e reserva obligatorio na 25,5 porciento

Banco Central di Aruba ta mantene e reserva obligatorio na 25,5 porciento

Posted on 06/9/2023 10:09 am AST | Updated on 06/9/2023 10:22 am AST

ORANJESTAD - Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 25 di april 2023, CMM a dicidi pa mantene e tasa di e reserva obligatorio na 25,5 porciento entrante 1 di mei 2023. Di e manera aki, e banconan comercial mester tene un balansa minimo na BCA cu ta igual na 25,5 porciento di e depositonan riba termino cortico di nan clientenan. E decision pa mantene e reserva obligatorio na 25,5 porciento ta basa primordialmente riba un caida den e estimacion di likides excesivo di e sector bancario comercial na fin di maart 2023 compara cu december 2022. BCA ta sigui monitorea e desaroyo den e likides excesivo y lo por dicidi di cambia e tasa di reserva obligatorio, si ta considera esaki necesario. 

E CMM a considera e siguiente informacion y analisis den su deliberacion.

RESERVANAN INTERNACIONAL Y OFICIAL

E reservanan internacional, cu ta consisti di reservanan oficial di BCA y reservanan di divisa na e banconan comercial, a baha cu Afl. 149,4 miyon te cu 31 di maart 2023, compara cu fin di december 2022 (Grafico 1). E reservanan oficial a mengua cu Afl. 40,1 miyon, mientras cu e reservanan na banconan comercial a disminui cu Afl. 109,3 miyon. Consecuentemente, te cu 31 di maart 2023, e reservanan oficial y internacional a suma Afl. 2.750,8 miyon y Afl. 3.091,9 miyon, respectivamente. 

Mantencion di un nivel adecua di reservanan ta esencial pa mantene e tasa di cambio fiho entre e florin Arubano y e dollar Mericano. Teniendo cuenta cu esaki, apesar di e caida menciona anteriormente, reservanan internacional a keda ampliamente riba e rekisito di tres luna di pago riba e cuenta coriente di e balansa di pago den maart 2023. E pagonan riba e cuenta coriente di e balansa di pago ta consisti, entre otro, di pagonan pa importacion, pagonan di interes na inversionistanan stranhero y transferencianan pa exterior manera placa manda afo door di trahadonan stranhero. Reservanan oficial tambe a keda dentro di e margen aceptabel basa riba e metrico ‘Assessing Reserve Adequacy’ (ARA) di e Fondo Monetario Internacional (FMI) (Tabel 1). 

 

 

INFLACION

Inflacion, midi na final di luna contra e luna di e aña anterior, a yega 7,1 porciento den februari 2023 (januari 2023: 6,6 porciento) (Grafico 2). E aumento den e Indice di Prijs di Consumo (IPC) na februari 2023 compara cu februari 2022 tabata causa door di e crecemento den prijs di utilidad, cu a sigui afecta e componente di ‘vivienda’ (contribuyendo cu 3,1 punto di porcentahe). Tambe e prijs di gasoline y prijs pa compra di vehiculonan a subi, impactando e componente di ‘transporte’ (contribuyendo cu 1,6 punto di porcentahe), mientras prijs di e componente ‘cuminda y bebida no alcoholico’ tambe a aumenta (contribuyendo cu 1,3 punto di porcentahe). 

E inflacion midi riba promedio di 12 luna a subi te na 6,1 porciento na februari 2023, compara cu 5,8 porciento na januari 2023. E presion inflacionario tabata debi na e nivel eleva di prijs di petroleo riba mercadonan internacional y e aumento den prijs di awa y coriente desde augustus 2022. Ademas, Aruba a importa un gran parti di e aumento den prijs for di su partnernan comercial, particularmente Estados Unidos y Europa. 

Mientrastanto, na februari 2023, inflacion basico (excluyendo cuminda y energia) a alcansa 3,0 porciento (januari 2023: 2,5 porciento) si midi e final di respectivo luna contra e mes un luna di e aña anterior. Basa riba un promedio di e ultimo 12 lunanan, inflacion basico a yega na 2,4 porciento (januari 2023: 2,3 porciento).

 

LIKIDES EXCESIVO DI BANCONAN COMERCIAL

E total di likides excesivo di e banconan comercial a desminui di Afl. 819,7 miyon na december 2022 te na Afl. 725,3 miyon na februari 2023, continuando riba e tendencia di bahada observa durante 2022 (Grafico 3). Ademas, estimacion preliminario di e likides excesivo na maart 2023 a indica un caida adicional di Afl. 69,2 miyon compara cu februari 2023. Sinembargo, likides excesivo a permanece riba e nivel estima (+Afl. 354,3 miyon) cu e banconan comercial posibelmente ta desea di mantene como un refuerso di likides adicional. 

 

 

 

 

 

 

  • Powered by SETAR