- Joran vd Sloot na Merca a declara su mes no culpabel di extorsion
- Conocido personahe den farandula y Catochi na Corsou, 'Joe Black' a fayece
- Ex-trahador di DIMP a keda deteni pa a tuma placa bou mesa
- Banco Central di Aruba ta mantene e reserva obligatorio na 25,5 porciento
- Gobierno ta trahando riba plannan pa conmemora 150 aña cu a aboli sclavitud na Aruba
CAFt: Aruba ta rekeri reforma y esfuerso firme pa cumpli miho riba corto plazo
DEN HAAG – Aruba ta rekeri reforma y esfuerso firme pa mehora cumplimento fiscal riba corto plazo. Asina e colegio di supervision financiero pa Aruba CAFt a bisa secretario di estado Hulandes Alexandra van Huffelen durante nan bishita e siman aki na Hulanda. Di 22 pa 24 di mei 2023 e Colegionan di supervision financiero a haci un bishita di trabou na Hulanda. Aya nan a reuni cu Secretario di Estado di Asuntonan Interno i Relacion den Reino, Secretario di Estado di Finansa, e miembronan di Eerste y Tweede Kamer, e Ministernan Plenipotenciario, Controlaria General (Algemene Rekenkamer) y Conseho di Estado (Raad van State). Durante e combersacionnan a papia tocante un trayectoria plurianual pa logra un finansa publico sostenibel y e prioridadnan principal relaciona cu esaki pa e paisnan y entidadnan publico den Caribe.
Corsou, Aruba y Sint Maarten ta concentra nan mes riba recuperacion despues di e añanan di crisis. Pa esaki, segun e Colegionan, ta importante pa reduci nivel di debe y aumenta nivel di inversion. Esaki ta rekeri surplus presupuestario for di aña 2024. Corsou a registra bon resultado recientemente cu aumento di entrada fiscal. Aruba y Sint Maarten tin un gran potencial ainda pa esey. Esey ta rekeri reforma y esfuerso firme pa mehora cumplimento fiscal riba corto plaso. Control di gasto tambe ta sigui ta mes importante pa e tres paisnan. Inversion cu ta reforsa economia lo yuda den e recuperacion. Ta pa e motibo ey e kolegionan ta recomenda pa yega na plan di inversion plurianual. Un otro prioridad importante ta pa haci e fondonan social sostenibel. Sin reforma, nan lo resulta inpagabel den futuro.
Pa e entidadnan publico di Boneiro, Sint Eustatius y Saba prioridad mas specifico ta conta. Maneho financiero ta keda un punto di atencion pa tur e islanan. Pa Saba respecto garantia di nivel y pa Boneiro y Sint Eustatius respecto e mehoracionnan cu ta realisa.
Segun CAFt, e retonan riba tereno di finansa publico den parti Caribense di Reino, y cu esey e importancia di supervision financiero, ta mes grandi ainda. Door di pone prioridad y reforsa e relacionnan, e colegionan ta spera di por contribui atrobe pa logra un finansa publico sano y sostenibel den e proximo periodo.
Presidente Lidewijde Ongering y e miembronan ta mira atras na un biahe exitoso. E colegionan ta bishita Hulanda un biaha cada dos aña. E bishita a tuma luga pa prome biaha bou di presidencia di Lidewijde Ongering. E colegionan ta consisti ademas di e presidente, di e miembro postula pa Hulanda Hans Hoogervorst, e miembro postula pa Aruba Hellen van der Wal, e miembro postula pa Boneiro, Sint Eustatius y Saba Glenn Thodé, e miembro postula pa Sint Maarten Julisa Frans y e miembro postula pa Corsou Gregory Damoen.
Studiante Caribense tambe por ricibi un beca basico atrobe pa studia na Hulanda
DEN HAAG – SStudiante di e parti karibense di Reino ku ta bai studia na Hulanda na un skol superior òf universidat for di sèptèmber tambe ta risibí un beka básiko atrobe. Eerste Kamer awe ku sosten amplio a bai di akuerdo ku e proposishon di lei pa e reintrodukshon di e beka básiko den enseñansa superior. Studiante ku tin derecho riba esei, for di djaluna 19 di yüni por pidi un beka básiko na DUO.Noticiacla anteriormente a raporta esaki caba pa studiantenan di Hulanda mes. Pero awor ta resulta cu studiantenan di Caribe Hulandes tambe por probecha di e beca aki.
Delegacion di Parlamento di Aruba a bishita Arubahuis
DEN HAAG – Un delegacion di Parlamento di Aruba a haci un bishita na Arubahuis na final di e reunionnan di IPKO. Na Arubahuis e delegacion a wordo ricibi pa Minister Plenipotenciario mr. Ady Thijsen, director a.i. drs. Glenda Hernandez y personal di Arubahuis.
Na Hulanda, e basis beurs ta bin bek den e proximo aña escolar
DEN HAAG – Ta practicamente sigur cu e beurs basico pa studiante na Hulanda lo bolbe atrobe. Esaki despues cu Eerste Kamer tambe a bay di acuerdo pa re-institui esaki bek, unabez cu Tweede Kamer a aproba esaki. E intencion ta pa re-introduci esaki e proximo aña escolar caba. E beurs basico ta reemplasa e sistema introduci na 2015 cu tabata pone cu studiantenan cu mayornan bon para, no tabatin mester di placa di gobierno, pa studia, cu tabata pone cu gobierno por a spaar e placa ey y use pa mehora e calidad di enseñansa. Sinembargo mas y mas partidonan politico tabata critica e sistema, y hopi studiante tabata acumula debenan astronomico cu tabata conduci na stress. Y e calidad di enseñansa no a bira loke e mester a bira. Durante e ultimo reunion di formacion di gobierno, partidonan VVD, D66, CDA yChristenUnie a palabra cu e beurs mester a bolbe. Na februari caba Tweede Kamer a vota pro, y awor den Eerste Kamer, ningun hende a vota contra.
Publico por vota pa e candidatonan pa Appeltje van Oranje 2023
ORANJESTAD - For di 31 mei, públiko por vota riba e 38 proyektonan ku ta kandidato pa un Appeltje van Oranje. E proyekto ku logra akumulá mas tantu voto lo pasa mesora pa e ronda di dies finalista. Tur aña, Oranje Fonds ta otorgá Appeltjes van Oranje na proyekto sosial eksepshonal ku ta di importansia pa hende den nos komunidat. E aña akí, pa di promé bes lo por vota tantu pa proyekto di Hulanda komo di e parti karibense di Reino. E aña akí, e proyektonan partisipante ta di Aruba, Boneiru i Kòrsou. Votashon ta keda habrí te ku dia 9 di yüni, na stem.oranjefonds.nl.
Delegacion di Aruba ta na Hulanda caba pa Reunion Interparlamentario di Reino (IPKO)
DEN HAAG – Manera cu Noticiacla a raporta caba, di diahuebs awor, 1 di juni pa dialuna 5 di juni 2023, Reunion Interparlamentario di Reino (IPKO) ta tuma laga na Den Haag. Durante IPKO, e delegacionnan di Aruba, Curaçao y Sint Maarten y Hulanda ta reuni pa debati riba tema cu ta afecta e paisnan den Reino. E temanan di e IPKO aki ta cambio climatico y adaptacion na esaki, educacion, e proximo Conferencia di Reino, seguridad di data den Reino y superacion y procesamento di colonialismo y pasado di esclabitud.
Hulanda preparando pa comienso di reunionan di IPKO na Den Haag e siman aki
DEN HAAG – Hulanda ta preparando pa ricibi Parlamentarionan di Aruba, Corsou y St Maarten e siman aki pa reunionan Interparlamentario di Reino Hulandes, conoci como IPKO. E reunionan ta tuma lugar di diahuebs 1 di juni 2023 te cu dialuna 5 di juni 2023. E reunionan lo ta presidi e biaha aki pa presidente di comision fiho di Relacionan di Reino di Tweede Kamer, esta Mariëlle Paul (VVD), riba temanan comun cu ta toca e paisnan mnciona. Temanan den e reunion aki ta entre otro cambio di clima, enseñansa, e conferencia pendiente di Reino, seguridad di data dentro di Reino y e proceso di kolonialismo y pasado di sclavitud. NOTA: E potret ta di e ultimo reunion di IPKO cu a tuma lugar na Corsou na februari di e aña aki.
Follow NoticiaCla
