Cada vehiculo di polis a ricibi material nobo di prome auxilio

Cada vehiculo di polis a ricibi material nobo di prome auxilio

Posted on 11/24/2022 9:43 am AST | Updated on 11/24/2022 9:43 am AST

ORANJESTAD – E siman aki polis a ricibi  materialnan di prome auxilio pa ekipa cada vehiculo di Cuerpo Policial, pa asina nan por brinda asistencia medico inmediato ora presenta na un incidente. Ora tin casonan cu ta rekeri esaki mayoria bes ta e Agente Policial ta e prome pa yega na e sitio, sigui pa e Ambulance, pues di parti di Ministerio di Husticia y Asuntonan Social ta mira e importancia pa cada Agente Policial por ta miho prepara pa atende e tipo  di casonan aki. 

Segun Minister di Husticia Rocco Tjon, e tarea primordial di un Agente Policial ta pa brinda ayudo pues “hulpverlening”, y pa nan por haci esaki optimalmente, nan mester di e materialnan necesario. Pa algun tempo caba ta ensayando cu “Medic First Aid Equipment” y training pa tur personal di Cuerpo Policial. Asina por bisa cu na Juli 2022 a cuminsa practica esaki cu e prome grupo cu algun personal di “Strandpolitie”, Polis Maritimo y Polis di Bario di San Nicolaas. BRA a cubri e opleiding aki completamente, y a ricibi ekipo di asistencia di ambos HOH y Web pa por a duna e curso aki, cu un resultado sumamente positivo.

Debi na esaki, a logra concretisa e proyecto caminda tur e autonan di polis ta bay wordo ekipa cu materialnan pa nan por brinda e prome auxilio aki. A adkiri entre otro: Trauma Bags-For Natural y Torniquet with Buckle (pa tur patruya y AT), Philips HeartStart AED Defibrillator (un pa tur warda di Polis principal y un pa AT), Philips Replacement Adult SMART Pads (reserve), Philips Replacement Infant/Child SMART Pads (reserve), CPR Training Adult/ infant Manikin Kit (pa e curso), Disposable CPR Mask (pa tur Polis tin na tur momento cu nan), First Responder Bag (pa Polis Maritimo), Nasal Cannula (pa Polis Maritimo), Non-Rebreather Mask (pa Polis Maritimo). 

Pues awor nos agentenan policial tin e materialnan necesario pa nan por brinda e asistencia di prome auxilio. Banda di esaki tambe a percura pa brinda opleiding cual lo cuminsa na Januari 2023 pa asina tur agente policial por haci miho uzo di e ekiponan aki cu a wordo adikiri pa nan.  

  • Powered by SETAR