ORANJESTAD – Otro siman diaranson 29 di juni 2022 pa 9’or di mainta, DOW lo habri e caminda pa asina automobolistanan cu ta bini for di Palm Beach direccion Oranjestad por haci uzo di e rotonde di Palm Beach. Trafico for di Oranjestad pa Palm Beach lo wordo desvia via Keito/Monserat pa yega Palm Beach. Esaki kiermen cu diaranson DOW lo cuminsa traha riba fase 2 cu ta e otro mita di e rotonde. Pendiente pa dialuna 27 di juni 2022 pa 3’or di atardi DOW lo duna un conferencia di prensa y asina presenta e ruta di desviacion pa publico.
ORANJESTAD – Oficina di turismo a informa diabierna atardi cu Aruba ta elimina seguro obligatorio de Covid-19 pa bishitantenan. Nan a recorda cu na juli 2020, Aruba a habri su frontera bek pa bishitantenan di Estados Unidos y a inicia cu e Aruba Visitors Insurance. Esaki tawata un innovacion den medio di pandemia, cu a wordo sigui despues pa otro destinonan. E seguro aki tawata obligatorio pa tur bishitante y di e forma aki a sigura cu tur caso di turista cu a test positivo durante nan estadia por a conta entre otro riba cobertura di acomodacion pa isola, transporte, test di covid y gastonan di dokter, hospital y ICU.
ORANJESTAD – Sindicato di maestro SIMAR ta considera e anuncio di aumento di tarifa di WEB como un baño di awa friu, y a manda nan preocupacion pa prome minister Evelyn Wever Croes diahuebs atardi mes. Den e carta nan ta splica nan preocupacion y desaprobacion di e loke a sosode. E noticia pa miembronan di e sindicato, a bin como un sorpresa total, y cu ta haci nan situacion financiero aun mas fastioso, banda di e recorte salarial. A comparti cu varios miembro ainda tin problema tur luna pa cera placa pa por cubri nan gastonan. Ademas nan tin duda ainda cu enberdad luna di juli 2022 lo nan haya e recuperacion manera priminti di e 5% di salario. “Nos ta en espera ainda di e decision definitivo di e recuperacion di 5% di salario” e presidente di sindicato ta bisa. A recorda cu awa ta un necesidad basico y primario y cu esaki lo aumenta e problemanan social den enseñansa. Acerca a bin e problema di luna di mei y juli di aumento drastico di gasoline, cu ta limita e mobilidad di varios miembro.
ORANJESTAD – Ministerio Publico ta habri desde diabierna prome di juli 2022 normalmente desde 08.00 or di mainta. Asina vocero di e departamento, Ann Angela a bisa diahuebs. Manera ta conoci e departamento tambe a cera diaranson debi na e menasa di mal tempo. Tur afspraak pa busca e carta di buena conducta (vog) a wordo posponi pa diamars 5 di juli 2022. Por mantene e orario riba bo invitacion.
Si bo ta rabia cu ayera ‘nada’ no a pasa, y cu bo a gasta boshi placa cumpra yen di cos extra ‘pornada’, pensa cu awe e headline por tabata diferente. E por tabata “Islanan ABC destrosa pa tormenta Bonnie, hopi destruccion, famianan perdi, etc etc”. Awe bo ta lanta, contento cu bo propiedad ta unda e ta ainda, y cu bo tin un dia mas pa biba. E placa cu bo a gasta ayera, ta nada, compara cu loke bo por ta tin na gasto extra awe, si e mal tempo a pasa manera cu e tabata poni pa pasa. Un colega di prensa na Corsou ayera ainda ta conta con Thomas (un rabo) a lague cu 30 mil na gasto. Awor porta bo a gasta algun shen florin, (cu ta hopi, pero bo mester relativ’e si). Considera ayera un bon training. Corda semper, miho bon prepara, y alerta, cu trankil y sorprendi pa un mal tempo cu ta lagabo cu mas debe (cu bo tin caba) cu nunca. Y porta bo no ta un creente, pero algo a bolbe pone cu nos a scapa di loke por tabata un disaster natural. Be grateful, and move on! Scirbi pa Tito Laclé.
ORANJESTAD - Meteo a di informa cu e peor di e mal tempo ta mustra di ta tras di lomba, sin causa daño mayor na Aruba. E mal tempo a pasa basta leew di nos, 90 km zuid di Aruba. Ya pa 11or pm diaranson anochi National Hurricane Center a kita e status di Aruba di tropical storm warning. “Nos lo sigi monitor pa mira si un “rabo” por causa molester” prome minister Evelyn Wever Croes a bisa diaranson anochi laat.