Analysis: Pakico si, y pakico no…

Analysis: Pakico si, y pakico no…

Posted on 01/14/2022 9:47 am AST | Updated on 01/14/2022 10:34 am AST

Tur ora mi tin cu ‘hari’, pa no haci otro ora mi mira comentario of reaccion riba cierto noticianan cu wordo ubica en general, of mas specifico riba noticiacla.com. Mi ta compronde cu no tur ora bo ta di acuerdo cu e noticia, depende ki banda di e noticia bo ta para. 

Hopi ta e biahanan cu hende ta puntra pakico tal y tal cos ta wordo considera como ‘noticia’. Aki e mesun punto ta bin dilanti, esta cu no tur hende ta wak ‘noticia’ cu e mesun wowo, y/of ta cualifica ‘esaki of esaya’ como noticia. Hopi ta confundi PR y noticia, y ta kere cu nan ta mescos of cu nan tin mesun peso. 

Un ehempel classico ta ora cu cierto cosnan sosode cu cierto persona(nan) cu ta haya atencion ora cu ‘esaki of esaya‘ a pasa cu e persona of grupo of compania en cuestion. “Nan tambe ta hende, mescos cu nos”, ta e comentario mas comun e ora. “Con esaki ta noticia?” ta e siguiente pregunta. Of, “Pakico a opta pa tapa wowo di ‘esaki of esaya’, siendo cu tur hende supuestamente sa ken e persona of personanan ta”. E ora ta bira momento pa mi bisti mi sapato di maldad (stoute schoenen), y bisa esnan cu ta bisa ‘esaki y esaya’, pa ‘keda riba nan teritorio di dominio’, osea ‘schoenmaker blijf bij je leest’. No tuma mi na malo. Laga mi splica toch. Den mundo di noticia, un persona cu tin un cierto funcion of titulo, manera un asina yama ‘voorbeeldsfunctie’ ta haya un conotacion diferente den mundo di noticia. Punto. Ora cu p.e. un minister, presidente of un hefe di un compania multinacional bisa algo, e tin mas peso cu ora cu un persona ‘comun’, bisa porta algo specifico, of e frase cu abo cu mi a bisa, ta exactamente mescos. Simplemente pasobra nan (e persona cu funcion di ehempel) tin un responsabilidad mas grandi cu ami cu bo. Y ora cu NAN bisa algo, e kier men algo poco diferente y tin consecuencia diferente. 

Recientemente tabatin keho ora cu cierto persona wordo raporta di a haya Covid19. E pregunta tabata surgi, ‘Pakico haci esaki un noticia? Esaki ta su bida priva, respeta esaki, esaki no ta noticia pasobra ami tambe a hay’e y e no tabata noticia”. Wak rond, internacionalmente, ora cu cada ‘persona di peso’ a haya e virus, e la bira noticia. Asina e mundo di noticia ta funciona. Den e caso di e virus mundial, e mencion ta pasobra e.o. e ta mustra asina cu e malesa aki no ta discrimina. Y ora cu un persona den e caso aki actua diferente, e tin consecuencia pa henter e pais. Tuma e ehempel na Corsou, unda cu e minister actual di salud no kier a bisa si e la vacuna of no, mientras cu gobierno completo ta core campaña di vacunacion contra e virus Covid19. Si e no kier vacuna, ta su derecho, pero e ta manda un señal pa e resto di e isla, sugeriendo e.o. cu nan no mester vacuna. Y pesey e ta bira noticia. E ta contradeci su gobierno y esaki ta bira un problema di maneho. Pa colmo, recientemente e tambe a keda contagia cu e virus y como tal e la bira noticia. Aki na Aruba tambe tabatin un caso asina e siman aki ora cu director di hospital a test positivo. Aki tambe a cuestiona pakico esaki ta noticia, y pakico ta publica algo cu mester ta priva. Den e caso aki tambe e ta haya mas peso, pasobra e ta mustra cu ‘hasta un director di hospital’, no a scapa di e virus aki. Den e caso aki y mayoria otro, ta e persona mes ta opta pa anuncia esaki, pues no ta violando ningun tipo di privacidad. Loke a hala atencion tambe den e caso aki, ta cu e director a opta pa no vacuna, cu ta su derecho pero cu un reciente articulo den un vespertino, a trata e caso aki. E minister di salud no a gusta, y esaki a bira e noticia. Mientrastanto e asunto a keda regla entre e partidonan. Ora cu lansa comentario,  ta bon e ora pa puntra prome cu lansa e atakenan’ ora cu cuestiona cierto cosnan. Y asina por sigui. Recientemente un minister local a bisa cu e no tabata sa cu no por a tira klapchi dia 6 di januari siendo cu ley ta prohibi esaki. E mandatario su reaccion tabata algo den direccion di ‘awel bin busca mi pa cera’, of y ‘laga nan mandami e multa, nan sa unda pa haya mi’. Un reaccion asina, ta manda e mensahe robez pa comunidad, unda cu si ami of abo bisa esaki, ora di actua contra ley, nos no ta wordo bon sirbi. Y ora cu un mandatario declara cierto cosnan, e TA bira noticia, pa e simple motibo di e peso di e persona cu e tin, y e loke e la bisa y e impacto cu e por tin riba un comunidad. Otro biaha cu bo wordo gara ta haci algo illegal, bo tambe por bisa, mi no tabata sa, y cla ta toch? Pero ley no ta funciona asina. Mi por menciona tambe cu p.e. tin masha hopi hurisprudencia di casonan di difamacion den Corte cu politico, mandatario o personanan den funcion publico a entama, cu unu pa unu nan a perde como cu hues a bisa nan: "Hoge bomen vangen veel wind". Ta hala di e casonan aki tin.Y asina tin mucho mas motibo di splica pakico cierto cosnan ta bira noticia y pakico cierto cosnan no. Cu bo no ta compronde of kier compronde, ta un, pero pa cuestiona e maneho di e medio, sin mas mas, si no ta na su lugar. Pa esnan cu ta cuestiona, awel, awor bo sa.  Saludos.

Scirbi pa Tito Lacle.

  • Conocido ex pelotero professional Calvin Maduro ta den Noticiacla LIVE diahuebs awor

    Conocido ex pelotero professional Calvin Maduro ta den Noticiacla LIVE diahuebs awor

    ORANJESTAD – Conocido ex pelotero professional y actual Pitching Coach Calvin Maduro ta invitado di Noticiacla LIVE diahuebs awor pa 9’or di anochi. Despues di a fungi como pitcher estelar den grandes ligas den añanan 90, e la sigui como scout y awe e ta pitching coach di Minnesota Twins. Calvin ta comparti su experiencia amplio riba e tereno di baseball Grandes Ligas cu periodista Tito Laclé, di e.o. su carera mes,  kico ta bon kico ta malo den baseball professional, fayonan mas comun cometi ora di firma un prospecto, con e mes a experencia esaki, y ta repasa con un dia di un pelotero professional ta hinca den otro. Un entrevista interesante riba tereno di deporte, cu bo no kier perde. 

  • Casonan positivo diario di Covid19 ta sigui baha na Aruba

    Casonan positivo diario di Covid19 ta sigui baha na Aruba

    ORANJESTAD - Segun resumen di awe 164 persona a recupera y un total di 38 caso nobo di COVID-19 a keda registra di cual 9 ta no-residente. E cifranan aki ta representa un 'Positivity rate' bou di nos residentenan di 54%. E cantidad di casonan activo di COVID-19 pa awe ta 356 y cantidad di fayecidonan relaciona cu COVID-19 ta 193. Datos ta ilustra casonan nobo di COVID cu un averahe semanal di 137 caso pa dia y un averahe di 'Positivity rate' semanal di 53% pa dia. 

  • Gobernador a a bishita careda di boto miniature na Governor’s Bay

    Gobernador a a bishita careda di boto miniature na Governor’s Bay

    ORANJESTAD - Gobernador di Aruba, Su Excelencia Alfonso Boekhoudt, hunto cu su esposa Hanneke Boekhoudt-Koetse riba diamars 25 di januari 2022 a bishita e careda di boto miniatura na Governor’s Bay. Tradicionalmente e careda aki ta organisa pa Fundacion Rancho.  

  • LabHOH Aruba ta brinda ayudo na isla ruman st. Eustatius

    LabHOH Aruba ta brinda ayudo na isla ruman st. Eustatius

    ORANJESTAD - Recientemente LabHOH Aruba a duna St. Eustatius asistencia den forma di material y aparato pa test PCR. Segun e laboratorio, e departamento di microbiologia di LabHOH ta acredita cu e standardisacion di ISO 15189 garantisando asina calidad y experticio. Naturalmente LabHOH no a duda den brinda sosten unda cu por y asina Aruba a yuda e departamento di Salud Publico (OG) na St. Eustatius. Un aparato di marca y modelo Abbott ID NOW a wordo fia pa por haci e Rapid NAAT test cu ta duna resultado den 20 minuut. LabHOH a kita e aparato aki temporalmente for di airport na Aruba pa asina por brinda nos islanan ruman asistencia den esaki. Ademas a manda algun “cartridges” pa por realisa e testnan y a yuda negosha cu diferente contactnan pa asina e departamento di OG por a ricibi masknan N95 riba termino corto.

  • Miembro nobo di Raad van Advies a huramenta cerca Gobernador

    Miembro nobo di Raad van Advies a huramenta cerca Gobernador

    ORANJESTAD - Señor J.P. (Hans) Ruiter riba diabierna 21 di januari 2022 a huramenta como miembro nobo di Raad van Advies den presencia di Gobernador di Aruba, Su Excelencia Alfonso Boekhoudt. E huramentacion a tuma luga na Cas Ceremonial di Gobernador den presencia tambe di e presidente interino di Raad van Advies, señor Rik Timmer.

  • Doño di compania ta admiti cu a usa Corsou pa pasa 140 miyon na oro ilegalmente

    Doño di compania ta admiti cu a usa Corsou pa pasa 140 miyon na oro ilegalmente

    WILLEMSTAD - Doño di un kompania di trùknan blindá akusá di tabata hunga un ròl importante den kontrabanda ku tabata envolví Sur-Amerika, Karibe i Sur Florida a deklará su mes kulpabel di a entregá dokumentonan falsu na duana ku mester a menshoná e orígen real di kargamentunan di oro ku a ser importá via di Miami International Airport. Jesus Gabriel Rodriguez Jr., CEO di e kompania di trùk Transvalue Inc. a atmití komo parti di e dil ku el a sera ku ministerio públiko, ku el a yuda importá míles di kilo di oro balorá na $140 mion den Merka, for di Kòrsou i sabiendo ku e dokumentonan di duana tabata falsu den menshon dje orígen.

  • Powered by SETAR