DVG: Pronto e di 3 vacuna contra Covid lo ta disponibel na Aruba

DVG: Pronto e di 3 vacuna contra Covid lo ta disponibel na Aruba

Posted on 10/13/2021 9:29 am AST | Updated on 10/13/2021 9:30 am AST

ORANJESTAD - Manera ya ta conoci, Organisacion Mundial di Salud ta recomenda pa personanan cu un sistema inmunologico comprometi of debil pa tuma un refuerso referiendo aki na un di tres dosis di e vacuna di Pfizer contra COVID-19 pa mantene nan anti-curpanan presente. 

Despues di consulta cu entre otro RIVM di Hulanda y demas profecionalnan riba e materia, dentro di poco Aruba tambe lo bay cuminsa suministra e di tres dosis di vacuna di Pfizer na un grupo di pashent selecta. Na e momento aki Departamento di Salud Publico hunto cu organisacion di dokternan di cas y tambe specialistanan ta reuniendo pa por yega na e grupo cu ta bin na remarke pa e di tres vacuna cu ta entre 1.000 cu 1.500 pashent. E pashentnan cu ta bin na remarke manera ya a menciona ta personanan cu condicion di salud hopi fragil y mayoria ta bou tratamento di specialista of supervicion di dokter di cas. Atraves di dokter di cas of specialista e pashentnan aki lo ricibi un ‘verwijsbrief’ pa acudi na Departamento di Salud Publico (DVG) pa ricibi e di tres vacuna. Sin ‘verwijsbrief’ ningun persona lo no por ricibi e di tres vacuna. 

Pashentnan cu ta bin na remarke pa ricibi e di tres vacuna di Pfizer ta pashentnan cu tin un of mas di e condicionan di salud aki bou menciona y alabes e pashent mester a ricibi su di dos vacuna di Pfizer mas cu 1 luna pasa. Esnan cu ta bin na remarke ta: 

-        Pashent cu menos di 2 aña pasa a ricibi un transplante di beenmerg of stamcel 

-        Patient cu a recibi tratamiento pa un malesa maligno hematologico e ultimo 2 añanan 

-        Tur patient cu tabata tin chemo na 2021

-        Cierto patient cu  problema cu rion cu tambe ta usa ‘biological’s. Nan ta bou tratamiento di specialista

-        Pashent cu ta dialisa

-        Es cu a ricibi un transplante di rion 

-        Patient cu a wordo trata cu cierto remedi fuerte cu ta baha inmunidad, manera por ehempel Rituximab, Cyclofosfamide o CellCept.

Si bo persona ta reconoce cu bo ta cay den e grupo aki riba menciona, esey por nifica cu bo persona ta bin na remarke pa ricibi e di tres dosis di e vacuna di Pfizer. Den e proximo 3 lunanan, ora cu bo tin cita cu bo specialista, e lo bay manda bo na DVG pa busca e vacuna. Si bo no tin cita cu bo dokter of specialista den e proximo 3 lunanan, bo por yama e oficina di bo specialista pa consulta si bo persona ta cay bou di e grupo cu ta bin na remarke pa e di 3 vacuna y pa busca bo ‘verwijsbrief’.

Ta hopi importante pa infatisa cu sin ‘verwijsbrief’ di specialista personal di DVG no ta autorisa pa por duna ningun persona un di 3 vacuna y tambe pa ricibi e di tres vacuna e persona mester a ricibi su di dos vacuna di Pfizer mas cu un (1) luna pasa.

  • Edificio di ex Aduana na Playa ta bira proyecto di Vivienda

    Edificio di ex Aduana na Playa ta bira proyecto di Vivienda

    ORANJESTAD – E edificio ‘bieu’ di Aduane na Playa ta bira un proyecto di Vivienda. Director di DOW señor Marlon Croes a confirma esaki diaranson mainta: “Nos ta bay construi un Departamento di Aduana nobo na Barcadera y e Departamento di Aduana na playa cu ta bandona aworaki por wordo converti den un proyecto di vivienda cu lo bay duna un balor añadi na e centro di Oranjestad pa cu su funcionamento”. Mas detayes e director no a duna, riba e tema. Pero por lo menos ta conoci awor cu e edificio ey lo haya otro destinacion awor.   

  • Gobierno a firma MOU pa e edificio nobo pa Aduana

    Gobierno a firma MOU pa e edificio nobo pa Aduana

    ORANJESTAD - Diaranson mainta na Infra Gebouw, Gobierno di Aruba a firma MOU cu Bohama pa e edificio nobo pa Departamento di Aduana. Aduana ya pa hopi aña ta den diferente edificio separa for di otro y esey nunca ta contribui na un bon spirito laboral. Un separacion asina nunca ta contribui na e cooperacion manera cu lo desea of mester. Aduana awo lo haya un edificio nobo na Barcadera caminda cu lo ta funciona tambe como punto central. Un edificio moderno cu ta cumpli cu tur exigencia y cu lo trece sigur un miho ambiente di trabou na Departamento di Aduana. Mes momento ta soluciona un problema hopi grandi cu tin na playa cu e edificio actual di Aduana cu ta decai y bashi y no ta hayando atencion. Prome Minister Evelyn Wever-Croes tawata presente y na Infra Gebouw y prome cu a firma e MOU hunto cu Director di Bohama, señor Sander Leijenaar, a gradici tur esnan envolvi cu a ta haci e proyecto aki un realidad. 

  • Aruba a registra total di 19 caso positivo nobo di Covid19 awe

    Aruba a registra total di 19 caso positivo nobo di Covid19 awe

    ORANJESTAD - Segun resumen di awe  11 persona a recupera y un total di 19 caso nobo di COVID-19 a keda registra di cual 2 ta no- residente. E cifranan aki ta representa un 'Positivity rate' bou di nos residentenan di 10%. E cantidad di casonan activo di COVID-19 pa awe ta 160 y cantidad di fayecidonan relaciona cu COVID-19 ta na 170. Datos ta ilustra casonan nobo di COVID cu un average semanal di 12 caso pa dia y un averahe di 'positivity rate' semanal di 8% pa dia.

  • Frederick Nuboer mes a entrega su retiro como VP di Contraloria General

    Frederick Nuboer mes a entrega su retiro como VP di Contraloria General

    ORANJESTAD – E vice presidente di Contraloria General di Aruba (conoci tambe como Algemeen Rekenkamer Aruba ‘ARA’) sr Frederick Nuboer a entrega su retiro na gobernador. Segun un comunicado di e propio instituto un dia despues, e motibo ta pasobra  ‘den cuadro di bon gobernacion, funcionamento di Contraloria General como instituto mester keda garantisa’. Apenas un dia prome, fraccion di partido MEP den Parlamento a pidi pa ‘su cabez’ den un carta manda na prome minister Evelyn Wever, basa riba un incidente cu a tuma lugar den fin di siman. Aki sr Nuboer lo a keda deteni a base di ‘buracheria’ den publico. Lider di fraccion di e partido Shailiny Lee den un carta pa e prome mandatario a pidi e mandatario pa ‘tuma pasonan necesario pa garantisa cu integridad y bon nomber di nos Contraloria General keda na halto’. Aki tambe e parlamentario ta referi na e incidente cu a tuma lugar y cu a keda cubri pa medionan di comunicacion. 

  • A tene caminata pa concientisa contra traficacion di hende

    A tene caminata pa concientisa contra traficacion di hende

    ORANJESTAD - Dialuna atardi a tuma luga e caminata pa inicia e campana di conscientisacion en conexion cu Dia Nacional contra Traficacion di Hende ‘Habri bo wowo’ cu a cuminsa for di Djispie’s place pa Plaza Daniel Leo. Prome Minister Señora Evelyn Wever-Croes y Minister di Husticia Rocco Tjon, na final di e discurso a duna nan remarke cortico enfatisando cu trafico y contrabando di persona tin consecuencianan grave. 

  • AZV a contrata e prome docter di cas cu a studia den nos region

    AZV a contrata e prome docter di cas cu a studia den nos region

    ORANJESTAD - Despues cu dia 18 september 2021 a registra e promer profesionalnan den nos registro di Arubig, awe AZV a contrata e promer dokter di cas cu a studia den region (Universidad El Bosque, Colombia) esta dr Geraldine Croes pa remplaza Dr Eelco Veringa.

  • Powered by SETAR