Premier Wever-Croes na Lampe: No ta pasobra RED a perde eleccion, regla no ta conta p’e

Premier Wever-Croes na Lampe: No ta pasobra RED a perde eleccion, regla no ta conta p’e

Posted on 07/21/2021 2:51 pm AST | Updated on 07/21/2021 2:51 pm AST

ORANJESTAD - “Mi ta compronde cu colega Lampe no ta gusta cu Ministerraad a overrule e, pero loke e colega aki mester compronde cu no ta pasobra nan a perde eleccion, regla no ta conta p’e “ tabata e prome reaccion di premier Evelyn Wever Croes contra colega minister Rudy Lampe. E reaccion di Wever tabata necesario segun e mandatario despues di -manera sra Wever ta cataloga e- atake feroz contra dje, unda cu den un carta pa Gobernador, a pidi pa pone e ministerio di Enseñansa bou di curatela. Segun Wever, e motibo segun Lampe, ta cu Premier Wever  a dicidi di para dos decision recien di Lampe.

E PROME DECISION 

E prome ta un decision recien di Lampe pa saca un parti di Scol Reina Beatrix y prop nan den edificio di Scol Paso pa Futuro. Premier Wever-Croes a wordo avisa di e plannan recien di e mudamento aki, door di mayornan y docentenan preocupa y malcontento principalmente pasobra nan no a wordo consulta. 

LOPENDE ZAKEN

“Mi a haya mi obliga na tuma e decision aki pasobra e mudamento aki no ta ‘lopende zaken’.  E ta un cambio drastico pa ambos scol y ta algo cu e minister demisionario mester laga pa e minister nobo tuma. Henter demas miembro di conseho di minister tabata di acuerdo cu mi y nan a sostene e decision. Pues ta un decision legitimo durante un periodo demisionario”, Prome Minister a duna di conoce. 

DI DOS DECISION 

E di dos decision cu tambe a bay asina, tabata otro decision hopi recien di Minister Lampe pa diripiente crea un scol MAVO na Colegio Nigel Matthew  na San Nicolas, cual ademas lo tin un impacto negativo riba demas scolnan MAVO na San Nicolas. E minister mes a bisa cu tin scarsedad di docente y cu no tin hopi studiante. Pues esey ta haci e decision di crea un MAVO diripiente asina, aun mas ilogico.

LAMPE NO TA GUSTA CU A OVERRULE E 

“Mi ta compronde cu colega Lampe no ta gusta cu Ministerraad a overrule e, pero loke e colega aki mester compronde cu no ta pasobra nan a perde eleccion, regla no ta conta p’e. Mi ta percura pa nos Gobierno haci un traspaso debido, cu un ‘overdrachtsdocument’ debido y sin cu nos ta mara e ministernan nobo na decisionnan tuma durante e periodo demisionario. Pa mi integridad y bon gobernacion no ta solamente palabranan. Nan ta forma di traha y biba. Mi a baha gobierno pa motibo di integridad y mi ta determina pa practica e reglanan di bon gobernacion te na final. Esey kiermen cu un minister no por implementa cambionan drastico durante periodo demisionario. Claro cu mi ta lamenta cu colega Lampe ta haciendo esaki. Ta e tin algun dia caba ta purba ataca mi y mancha mi reputacion. Pero mi ta kere cu pa awor tur hende sa ken ta ken”, Premier Wever-Croes a finalisa bisando.

  • E ocho ministernan di Gabinete Wever Croes II a huramenta!

    E ocho ministernan di Gabinete Wever Croes II a huramenta!

    ORANJESTAD - E ocho ministernan di e Gabinete nobo Wever-Croes II riba dialuna 20 di september 2021 a huramenta of haci promesa den presencia di Gobernador Interino di Aruba, Su Excelencia Yvonne Lacle-Dirksz. E obligacion di e ministernan pa huramenta of haci promesa prome cu aceptacion di nan puesto, ta stipula den articulo II.8 di e Constitucion di Aruba.

  • Gobernador interino a firma retiro di ministernan actual y nombramento di ministernan nobo

    Gobernador interino a firma retiro di ministernan actual y nombramento di ministernan nobo
  • Awe tardi Gabinete Wever Croes II su ministernan lo huramenta

    Awe tardi Gabinete Wever Croes II su ministernan lo huramenta

    ORANJESTAD – Awe tardi pa 5’or y mei, Gobernador di Aruba lo huramenta e 8 ministernan di Gabinete Wever Croes II, na Cas Ceremonial na Playa. Esaki mester a tuma lugar diabierna atardi pero no a keda cla na tempo y a pospone esaki pa awe tardi. Esey kier men cu pa awe tardi sra Evelyn Wever, Sr Ursell Arends, sra Xiomara Maduro, sr Geoffrey Wever, Sr Dangui Oduber, sr Rocco Tjon, sr Endy Croes y sr Glenbert Croes lo huramenta como minister. Algun di nan a cambia di cartera, sea completo of a cambia un cartera. Entre nan tin sra Evelyn Wever, Dangui Oduber, Glenbert Croes y Xiomara Maduro cu a ‘perde; un cartera y/of a switch cartera cu e tabatin anteriormente. Esnan cu lo bira minister pa prome biaha ta srs Rocco Tjon, Endy Croes, Ursell Arends y Geoffrey Wever.  

  • Huramentacion di ministernan ta cambia pa dialuna awor

     Huramentacion di ministernan ta cambia pa dialuna awor

    ORANJESTAD – Huramentacion di e ministernan di Gabinete Wever Croes II no ta sigui awe diabierna mas, sino ta pasa pa dialuna awor 5’or y mei. Esaki debi cu no tur cos a keda cla pa e huramentacion keda cla awe tardi 6’or manera cu tabata e plan. Otro siman dialuna e ora pa 5’or y mei, e huramentacion ta tuma lugar na Cas Ceremonial di Gobernador. 

  • Gobernador interino a huramenta 8 miembro nobo di Parlamento

    Gobernador interino a huramenta 8 miembro nobo di Parlamento

    ORANJESTAD  - Awe diabierna mainta, 17 di september 2021 na Cas Ceremonial di Gobernador a tuma luga huramentacion di e ocho miembronan nobo di Parlamento. Nan ta remplasa e ocho miembronan di Parlamento cu lo ocupa un puesto di Minister. E miembronan nobo di Parlamento ta e siguiente personanan:

  • Ursell Arends: Ministerionan di RAIZ lo no tin coordinador

    Ursell Arends: Ministerionan di RAIZ lo no tin coordinador

    ORANJESTAD – E ministernan di partido RAIZ lo no tin coordinador. Esey ta loke e lider di partido y futuro minister Ursell Arends a bisa como primicia den e programa Noticiacla LIVE diahuebs anochi na periodista Tito Laclé. “Nos ta bay traha bek den e aparato publico. Nos lo haci uso di e directornan di e dienstnan, pa nan ta e conseheronan” sr Arends a bisa. 

  • Powered by SETAR