ORANJESTAD - Siman pasa tabata tin e apertura virtual oficial di Centro pa Hoben y Famia. En conexion cu esaki, Centro pa Hoben y Famia a invita Parlamento di Aruba pa un bishita pa asina nan sera conoci cu e centro aki y tambe e servicionan cu esaki ta ofrece na e comunidad di Aruba.
E mainta a cuminsa cu un presentacion di e project coordinator di Centro pa Hoben y Famia, Yvonne Geerman-Bermudes, caminda cu a splica nan di e mision y vision di Centro pa Hoben y Famia y tambe locual ta e meta di e centro. Despues di e presentacion aki, teniendo cuenta cu distanciamento social, e grupo di parlamentarionan a wordo parti den dos grupo caminda cada grupo a haña un recorido den e centro. Durante e recorido aki nan tabata tin oportunidad pa haci pregunta y combersa cu trahadornan y tambe e partnernan cu ta forma parti di e centro. Di e manera aki nan por a haña un bista amplio di locual ta trata e trabou nan cu e centro ta hacienda pa fortifica famianan pa asina Aruba por tin un comunidad mas fuerte.
Centro pa Hoben y Famia kier a gradici tur parlamentario cu a bishitanan durante nan apertura. Tambe nan kier a invita mayornan, famia of cualkier persona cu tin pregunta tocante lantamento di un yiu, pa tuma contacto y tambe sigui nan pagina social ‘Centro pa Hoben y Famia’ caminda regularmente tin diferente informacion relata na lantamento di mucha y e importancia di esaki.
Centro pa Hoben y Famia ta un centro multidisciplinario unda diferente organisacion preventivo a uni pa ofrece e comunidad tur servicio cu nan tin bou di un solo dak. E meta principal di e centro aki ta pa brinda e sosten y guia den educacion y lantamento di yiu na mayornan, famia, educador y professional y ofrece programanan educativo specialmente na nos hobennan pa cu desaroyo riba e nivel social-emocional, personalidad y liderazgo. Pa mas informacion por tuma contacto directo cu Centro pa Hoben y Famia na 528-1200, por bishita nan personalmente na Sabana Blanco 68-C (ex. Acer building) na Wayaca. Tambe por comunica via email na [email protected] of riba Facebook @centropahobenyfamia.
ORANJESTAD – E situacion di Dengue na Aruba ta birando mas alarmante. Diahuebs Departamento di Salud Publico a informa cu a cuminsa hospitalisa hende cu ta infecta cu Dengue. Ta trata di 2 persona. Un di e personanan aki ta bek na cas, y e otro ta sigui interna cu complicacionnan serio debi na Dengue. Por a verifica cu ningun di e personanan aki a biaha recientemente, indicando cu ta trata aki di dos caso di Dengue di transmision local. DVG ta informa tambe cu ta observando mas caso cu ta di spera – of cu ta normal – pa e temporada aki.
ORANJESTAD - Entrante augustus 2024 e alumno di klas 1 lo siña lesa y skirbi na Papiamento. A organisa un trayecto di preparacion pa asina ekipa e cabesante y e maestro di klas 1 di scolnan basico (basisschool) cu e hermentnan necesario pa por implementa e parti aki di e maneho nobo di idioma den scol.
ORANJESTAD - Entrante 18 di april 2024, pa 9or di anochi via TeleAruba, Aruba completo lo por cuminsa presencia e serie documental ‘Blue Lizard Effect’. Un serie documental revolucionario cu ta profundisa su mes den e mundo fascinante di Aruba, pero di un angulo diferente. E serie ta explora e concepto energetico di felicidad y e conexion profundo cu e cultura, e hende, y naturalesa di e isla.